KUCHING: Anang nempa berita selebubu pasal penusah angus ti suah nyadi apin lama tu ke udah, pia ku Menteri Pemansang Rama, Tan Sri William Mawan Ikom.
Iya madah, beri awak ngagai piak ti bekuasa bejalaika pengawa mansik dikena ngenukuka kebuah penusah angus lalu rayat enda patut nyangka sengapa.
“Anang kitai nyangka sengapa laban nya (angus) ulih nyadi enda ngira bakani,” ku iya lebuh dipinta ngenang penusah angus ti suah nyadi di Sibu ti dipadahka endang sengaja dikereja sekeda piak.
Mawan arap bendar piak bekuasa bejalaika pengawa mansik enggau silik ngambika kebuah kebendar insiden nya ke nyadi ulih ditemu.
“Nadai ba runding aku pansik enda dipejalaika enda ngira penusah angus laban tiap kali insiden angus piak bekuasa baka polis enggau Opis Bomba enggau Penyelamat (BOMBA) deka bejalaika pansik.
“Pemadu beguna ditu kitai anang nempa anggap kediri empu,” ku iya nandu baru.
Berebak enggau nya iya ngelalau orang ti beempu premis sereta rumah panjai ngemeratka tikas pengelikun lebih agi bekaul pengawa nyampung tali karan.
Pekara tu dikena nyaga pengelikun sereta ngurangka ari insiden angus nyadi kelebih agi nyerumba musin kemarau, ku iya.
“Pengempu premis patut selalu beratka tikas pengelikun nyengkaum masang alat pemadah angus dikena ngurangka insiden nya nyadi,” ku iya.