SRI AMAN: Menteri Muda Pemansang Menua Pesisir enggau Pengawa Berumah, Datuk Francis Harden Hollis ngingatka apai indai di nengeri tu enda ngelempaika tanggungpengawa ngajar anak ngagai pengajar enggau piak sekula aja.
Iya madahka apai indai patut ngembuan tanggungpengawa ti sebaka enggau pengajar di sekula iya nya ngajar anak sida lebuh di luar sekula tauka abis sekula.
“Apai indai enda patut ngelakka tanggungpengawa ngajar anak ngagai pengajar aja tang patut ngerapitka kerejasama enggau piak sekula sereta pengajar ba pengawa ngenukuka pelajar anak, kelimpah ari ti ngajar anak diri empu di rumah.
“Pelajar anak pekara ti enda tau enda dikemeratka laban nya pelajar ti pemun pemujur pengidup dudi hari,” ku iya.
Harden ti nyadi ADUN Simanggang ngingatka pekara nya lebuh bejaku ba pengerami bejadika Larian Jogathon PIBG SMK Saint Luke, Sri Aman ke diatur ba Dewan Stonton sekula nya pagi kemari.
Bejaku baru iya ngelalau apai indai ngambika suah agi datai ke sekula nanyaka tikas pelajar anak ngagai pengajar sereta berandau enggau pengajar nyemakka anak bisi penanggul ba pekara pelajar.
Dikena ngenukuka anak teulihka pelajar ti engkeman ku iya, nyadi apai indai patut nyendiaka kereban sekula ti chukup ke anak.
“Ambika banding, dirumah apai indai patut nyendiaka bangku enggau meja dikena belajar, laban kereban ke chukup sereta endur belajar ti lantang ulih mantu ngulihka penyulut dalam pelajar,” ku iya.
Ba pengerami nya Harden ngungkupka belanja sepenyampau RM10,000 ngagai PIBG sekula nya dikena bejalaika aktiviti sereta ngemendarka 10 unit tangki ai diberi ngagai sekula nya.
Sama datai ba pengerami nya, Pengetua Cemerlang SMK Saint Luke, Sri Aman, Mering Jok Eng, Yang Dipertua PIBG, Jimbun Tawai sereta pengajar kanan ari sekula bukai.