KUCHING: John Chai Wen Han, 20, seiku ari dua iku volenter tauka sukarelawan ari Malaysia di atas kapal MV Logos Hope, pesta bup pengambis besai dunya ke diatu benung sangkai ba Palan Penyangkai Kapal Sim Kheng Hong di Pending, Kuching.
Chai, asal ari Kuala Lumpur, masuk raban krew antarabansa Logos Hope nyengkaum 400 iku volenter ari 60 buah menua deka ngasaika peneleba sekali dalam seumur idup mai penemu ngagai serata dunya nengah kereban bacha ke bekualiti tinggi.
Iya ngambi pemutus enggau masuk dalam kapal nya bulan Mei taun tu sebedau nampung pelajar ngagai universiti dalam bidang psikologi.
“Aku rindu ngaga utai ke meri penguntung ngagai mensia mayuh.
“Aku mega bisi awak meda mayuh bengkah main asal sereta betemu enggau orang ari mayuh bengkah menua. Dalam pengawa syif besehari-sehari aku diberi ungkup ba bagi pemakai.
Dalam tim ke sama enggau aku nya bakih ari menua Sweden, Mexico enggau Korea.
Ku iya MV Logos Hope, nya baka inisiatif tuchi antarabansa, nya sebengkah tempara ke manah ungkup diri empu mantu sereta meri servis ngagai mensia mayuh.
Sekumbang ti udah enggau masuk dalam krew nya dalam taun 2010, iya udah sangkai di mayuh bengkah wap nyengkaum di Hong Kong, Singapura, Lubnan, Emiriah Arab Bersatu, Mesir,Filipina, Libya enggau India.
Seraya ti nyadi pesta bup atas ai pengabis besai di dunya, MV Logos Hope udah sangkai di Kuching ungkup kali-5 kenyau ari taun 1972.
Sekali tu ari 12 Julai nyentuk ke 1 Ogos, lebih 5,000 iti bup dijual nengah rega ke nitihka pematut mungkur mayuh bengkah subjek baka sains, lumba, hobi, chara mela pemakai, rengka nero, perubat, jaku enggau filosopi.
MV Logos Hope, baka kapal bukai ke dikemataka GBA Ships e.V, organisasyen ukai begigaka untung lalu meruan bisi opis di Jerman, belayar di serata dunya mai penemu, bantu enggau pengadang. Kapal tu mega udah singgah di 1,400 palan di lebih 160 bengkah menua kenyau ari 1970 lalu udah nerima temuai lebih 42 juta iku. — Bernama