RM30,000 mujur digumpul SCGA, SDGA kena mantu mansa penusah angus di Sibu enggau Saratok
KUCHING: Gerempung Golf China Sarawak (SCGA) enggau Gerempung Golf Dayak Sarawak (SDGA) mujur ngumpul duit sepenyampau RM30,000 ti deka diberi ngagai orang ti dituntung penusah angus di Kampung Datu/Hilir, Sibu enggau Rumah Kupon Ingka, Saratok.
Penyampau ke digumpul nya asil ari pekit Golf Amal Mangsa di Kelab Golf Sarawak, Kuching, Sibu enggau Miri ti dipejalaika seretai kemari.
Semua asil ti mujur digumpul nya dikena mantu orang ti kena penusah angus di Kampung Datu/Hilir, Sibu sepenyampau RM20,000 enggau RM10,000 dikena mantu Rumah Kupon Ingka, Saratok.
Pengerami nyuaka replika chek pemeri nya dipenyadika Menteri Pemansang Rama Tan Sri william Mawan Ikom ti disuaka Presiden SDGA ti mega Kaban Kunsil Nengeri (ADUN) Batang ai Malcom Mussen Lamoh enggau Presiden SCGA Augustine Chin Lee Hin di Kelab Golf Sarawak, Kuching kemari.
“Aku ngarika perintah nengeri meri besai terima kasih ngagai pemanah inisiatif ti dipejalaika SDGA engga SCDA ti ngatur pekit amal tu.
“Taja pan enda berapa mayuh tang inisiatif tu chukup manah nyadika chunto sereta dikearapka ulih dikereja jemah ila.
“Aku ngarapka lebih mayuh agi serakup, kelab enggau gerempung ukai dikuasa perintah (NGO) ngatur inisiatif ti sebaka dikena bejalaika pengawa rama mantu orang ti begunaka bantu di nengeri tu,” ku iya ke mega ADUN Pakan sereta MP Saratok lebuh dikerandau.
Bebendar iya madah, pengawa mantu orang ti begunaka tulung ukai semina tanggungpengawa tauka dilempai ngagai perintah aja tang begunaka penyerata ari semua piak nyangkaum NGO.
“Pengibuh raban bansa dalam bejalaika aktiviti amal baka tu mega amat diguna ngambika sida ti begunaka bantu ulih dibantu,” ku iya.