NADAI CHARA BUKAI: Gambar fail tu mandangka Sawing Jengging seiku ari peranak ba Sekim Gempuru Skuau nimbun ai ujan ketegal penanggul bekal ai paip ba menua sida.
SIBU: Penanggul suntuk ai ke nuntung rayat ba bagi menua Selangau ukai pekara ke baru, pia ku Kaban Kunsil Nengeri (ADUN) Tamin Datuk Joseph Mauh Ikeh.
Ku iya, penanggul nya nyadi lebih agi baka maya musin kemarau kelimpah bisi penanggul ba tangki nyimpan ai ba Stapang enggau di Selangau.
“Tang penanggul tu mega bepun ari paip ke udah kelalu lama kelimpah mayuh udah pantis,” pia ku iya madah ngagai pengarang berita ditu, kemari.
Mauh madah, tangki ai naka ke diatu enda tetapika penyampau tubuh ba menua nya ke majak nambah.
Iya madah, udah mai penanggul nya ba aum Kunsil Nengeri ngarapka penyampau ai ditambahka agi kelimpah nganti paip ke udah kelalu lama.
“Tang perintah naka ke diatu empai nimbal berapa penyampau ke patut dikena ngaga baru tangki ai ba pelilih tu.
“Diatu tangki ai ke bisi enda tetapika penyampau tubuh lebih agi maya musin kemarau,” ku iya sambil madah tangki ai ba Stapang diambi ari Batang Oya lalu tangki ai ba Selangau diambi ari Batang Mukah.
Iya mega madah deka berandau enggau Opis Bekal Ai Sibu (SWB) senentang penyampau tauka pemayuh ai ke aruh dibekal ngagai rayat di pelilih Selangau.
Ari randau nya ku iya, ungkus dikena ngaga tangki ai baru ulih ditemu.
“Tang seagi-agi paip ai lama empai ditukar penanggul tu mengkang ditapi rayat ditu,” ku iya.
Empai lama tu tadi, ba surat berita tu, peranak Sekim Gempuru Skuau mantaika sebana sida ketegal suntuk bekal ai kenyau beberapa taun ke udah.
Ketegal penusah nya, sekeda ari sida nadai chara bukai kelimpah betimbunka ai ujan, dikena mandi enggau pengawa bukai.
Ba penemu sida, penanggul baka nya enda patut nyadi laban menua nya endang diatur enggau sistematik kenyau ari taun 1970 suba.
Sida semenua semina ulih ngena ai paip maya malam hari aja.
Nya pan enda sampai dua jam lalu semina ulih neritik baru ngalih hari seiti.