SIBU: Pasar Selangau deka dikemansangka agi nyengkaum disikap enggau perengka guna ti chukup dikena napi pemayuh tubuh ti majak nambah ngalu ngagai pasar nya ninting hari.
Kaban Kunsil Nengeri (ADUN) Tamin Datuk Joseph Mauh Ikeh maya dikerandau pengarang berita kemari madah, iya deka chakah ngubah pasar tu disikap enggau silik ba atur pemansang kelimpah alai rayat nyungkak penatai pemisi diri.
Ku iya, sebengkah ari pekara ke diatu benung dikemeratka iya nya palan alai paking kerita.
“Naka ke diatu pasar Selangau suntuk alai paking baikka paking lori enggau kerita tauka perengka pengangkut ke bukai lebih agi maya ujung minggu.
“Kitai deka nambahka agi penyampau palan paking ngambika rayat lantang agi bejalaika pengawa sida lebih agi pekara ti bekaul enggau dagang ba pasar tu,” ku iya.
Mauh madah, iya udah suah berandau enggau Opis Menua Pesisir Sibu (SMC) minta nambahka agi penyampau alai paking ba pasar nya.
Kelimpah ari pekara nya, ku iya, pasar tu mega aruh dikemanahka agi baka ngaga pintu penama ngelawa pasar nya.
“Pintu tu mega nyadika kelai ngagai bala mayuh ke bukai ngalu ngagai pasar tu.
“Nambahka nya mega, opis ti bekaul dilalau ngambika betanamka mayuh agi pun kayu tauka bungai ba sebelah pasar ngambika pasar tu lebih agi manah ari ke udah,” ku iya mantaika penemu baru.
Mauh mega maya tu madah, nama jalai ke dikena ngelai jalai ba pasar nya mega patut ngena nama ti engkeman.
Ambika banding ku iya, sebengkah ari nama jalai dia ti ngena nama Jalan Belian dipeda enda engkeman dikena tang manah agi enti ngena nama asal ti bisi kaul enggau menua nya empu.
“Nama jalai tu ukai pekara ke dipeda kitai lempung laban nama jalai ngelai sesebengkah menua lalu baka nama Jalan Belian tu, engkeman ke enda dipeda dikena ba pasar Selangau?” pia ku iya madah.
Berindik ari pekara nya, ku Mauh, iya ngarapka perintah ba taun-taun ti deka datai ulih mubuhka mayuh agi ungkup ngagai menua Selangau ngambika pemansang ba menua nya lantang agi diatur ukai semina ba pasar aja tang menua ba rumah-rumah panjai.