MIRI: Parti Keadilan Rakyat (PKR) Negeri ngansak orang mayuh ti nyadi mansa betapi enggau kes jenayah ngaga riput ngagai polis bekaul enggau penusah ti nyadi lalu enda ngelalaika pekara nya.
Ketuai Raban Indu PKR Negeri, Voon Shiak Ni madah, ulah orang mayuh ti ngelalaika penunsah ti ninggang sida, tau ngujungka raban polis melabaka pekara nya nadai nyadi laban nadai riput.
“Polis enda nemu nama kes tauka jenayah ti ditapi orang mayuh enti enda diriput. Nya alai amat beguna orang mayuh ti betapi enggau kes jenayah ngeriput ngagai polis, ngambika piak polis nemu kes ti nyadi sereta dirikut dalam statistik sida,” ku iya.
Bejaku ngagai pengarang berita ditu, iya madahka sekeda orang ti betapi enggau kes jenayah mayuh agi milih chara ngeriput ngagai Pusat Khidmat PKR nyengkaum di Kuching lalu minta piak parti (PKR) ngeriput ngagai polis ngambika tikas pengelikun ba sesebengkah endur dikemanahka agi.
“Lebuh aku nanya sida sekalika udah ngeriput ngagai polis tauka bedau, sida nyaut bedau, laban sekeda kes enda nyadi, lebih agi kes jenayah ba jalai alun baka kes ngeruntun, enggau kebukai.
“Bisi sekeda sida madahka diruntun tang enda mujur laban marik emas enda ulih diputuska lalu ‘selamat’, bisi mega madahka nadai nguna ngeriput ngagai polis laban marik tauka beg sandik sigi enda ulih ditemu. Nya ti ngujungka sida enggai ngeriput ngagai polis tang ngeriput ngagai Pusat Khidmat kami,” ku Voon.
Ku iya, nya (ulah enda ngeriput)mega ngujungka penyampau statistik kebendar ti dirikutka piak polis enda nunjukka pemayuh kes jenayah ke amat nyadi.
“Ambika banding, polis dalam statistik sida apin lama madahka penyampau jenayah jalai semina empat kes aja nyadi enggau tikas penyampau nya udah nurun. Tang dalam rikut kami (diriput orang ke betapi enggau kes), penyampau lebih mayuh ari nya. Pekara tu nyadi ketegal enda ngeriput ngagai polis,” ku iya.
Nya alai ku iya, nadai reti sida tauka orang mayuh minta polis ngangkatka pengelikun tauka nginau ba sekeda endur enti riput polis nadai digaga ti ‘madah’ ngagai polis kandang endur nya selalu endur kes jenayah nyadi.
“Berindik ari pekara nya aku minta kerejasama orang mayuh ngambika ngaga riput ngagai polis enti kes jenayah bisi nuntung baka ngeruntun enggau kebukai, sekalika mujur tauka enda dikereja orang ti ngereja penyalah nya, laban polis patut nemu kes jenayah bisi nyadi,” ku iya.
Apin lama ku iya, di mua opis Pusat Khidmat di Kuching, bisi nyadi kes ngeruntun tiga kali bejurut, tang nadai diriput ngagai polis laban ti ‘enda mujur’ sereta mujur dipuntanka orang mayuh.