Bansa Iban ulih lenyau pesaka asal nya nyema iya nadai dipelajar, ditampung bala sida ke nembiak
// Dikarang Judan Bungap //
SIBU: Bansa Iban ulih lenyau adat enggau main asal enti sida enda ngemerat sereta ngemeranka pesaka asal nya berengkah ari diatu.
Tuai Rumah William Ekie Maing madah diri balat nangika rebak baru enda nemu reti adat enggau main asal diri empu dalam kandang 20 ngagai 30 taun ti deka datai.
“Mayuh pekara ti tau ngelimpangka ati bala nembiak diatu ari rindu belajar tauka besaup ngetanka adat enggau main asal diri empu.
“Kami ke tuai mega enda ulih nagang sida ninggalka dua bengkah pekara tu ketegal ti udah megai pengarap Kristian.
“Pekara tu ulih dipeda kitai maya 20 tauka 30 taun ti deka datai enti enda ari diatu sida ke nembiak empu belabuh ngembuan pengeransing deka ngetanka adat enggau main asal aki ini kitai tu,” pia ku iya madah ngagai pengarang berita maya pengawa miring ba rumah panjai iya di Nanga Assan ditu, lemai kilah ensana.
Ekie seiku orang ke landik ba pengawa lama baka bebiau, bepantun, beramban sereta mayuh agi pengawa lama ke bukai.
Pengelandik iya tu endang dipurih ari niang apai iya Lemambang Maing Jimbun enggau niang aki iya Manang Rengie Tupai.
Ku iya madah, endang ari mit iya suah nitihka niang apai iya maya bisi dikangau orang nimang.
Berindik ari pekara tu, iya minta bala nembiak ke diatu enda ngira diau di rumah panjai tauka ba kandang mengeri anang jugau mending sereta belajarka pengawa asal diri.
Iya madah, bansa Dayak baka Iban diatu suah ngatur pengerami ba mengeri baka makai lemai ti ngena adat lama nyengkaum suah ngangauka lemambang.
Ku iya, seraya ke datai ngulu pengerami baka nya, nembiak tau meda enggau semak agi pengawa lama ke bisi diatur.
“Apai indai mega anang enda ngembing anak kita ngambika sida bela rinduka main enggau adat asal bansa kitai.
“Taja dunya diatu udah mansang, kitai anang enda nemu nama bagi tanggungpengawa ke patut dikereja ungkup pemanah bansa diri empu,” pia ku iya ti kala nyadi kaunsilor.
Ku Ekie, diatu mayuh gerempung baka Gerempung Dayak Sarawak (SDNU) enggau Serakup Indu Dayak Sarawak (SIDS) bisi ngatur pengawa ngajar nembiak bekuntau, ngajat enggau betabuh.
Pengawa baka tu ku iya, patut nyadika chunto ngagai gerempung Dayak ke bukai.
“Kitai ngarapka gerempung baka tu ulih ransing agi sereta anang leju ngajar nembiak laban sida ke diau ba mengeri nyangka muntang agi diembing kitai rinduka adat enggau main asal nengah pengawa ke diatur gerempung baka tu.
“Kelimpah ngajar gerempung tauka opis ti bekaul tau bendar ngatur pekit main asal ke diungkup ngagai sida ke nembiak,” ku tandu.