DINGA SEBANA KAMI: TR. Jelai (baris dua, tiga kanan) enggau Jelai (baris dua, dua kanan) begulai enggau peranak Sungai Baoh Burak, Dalat ke bukai.
DALAT: Peranak Sungai Baoh Burak minta perintah kelebih agi Kaban Kunsil Nengeri (ADUN) ditu nyaup mutarka isu tanah bansa asal (NCR) sida di menua nya ke dikeruga sebuah kompeni luar.
Tuai Rumah Sigah anak Lat madahka, sida serumah besemaya deka terus ngetanka hak tanah NCR nya ari ke terus dikeruga kompeni KENSO iya nya sebuah kompeni ke datai ari Singapura.
Sigah madah kena 8 Oktober tu tadi, peranak Sungai Baoh bisi ngatur randau enggau raban SALCRA bepalan ba rumah iya empu. Tang enda lama udah nya sida nerima berita madahka SALCRA nadai dikemendar ngaduka pemansang ba menua nya berindik ari penyarut pasal tanah ke agi bedau putus.
“Ngarapka perintah ulih mendingka sebana kami. Rayat ditu udah terang endang ari pun nulak projek Joint Venture Company (JVC) tang nama kebuah jaku kami nadai dikeibuh?,” ku iya.
Seiku agi peranak menua nya ke mega nyadi Chairman Komiti Pemansang Tanah NCR Sungai Baoh, Jelai madah sida meri terima kasih ngagai SALCRA laban udah bebendar nguji ngemansangka tanah NCR sida tang nadai ulih diterima ketegal bisi penanggul ke enda ulih diseliah.
Taja pia, ku iya 187 peranak menua nya agi endang enda leju ngeringka hak tanah NCR sida ke ngembuan 3,151 hektar pemesai nya lalu sida enggai mudah nyerahka tanah nya diteresa sengapa nyengkaum kompeni ari luar.
“Nyema sida majak ngeruga tanah nya, kami sigi nadai kakang ngaga ripot polis,” ku iya seraya madah raban sida ari Sungai Baoh deka betemu enggau Kepala Menteri minta saup mutarka penanggul nya enggau lengkas.