BEJADI: Lau ngetas riben kelai bejadika pengawa nya di Sibu, kemari. Bela bisi ayan Hii (kanan).
SIBU: Yayasan Tungkul Sengayuh Sibu (SKF) udah bejadika ‘Unit Kesedaran Buah Pinggang’ ba palan nya di Jalai Chong Jin Bock ditu, kemari.
Chairman SKF Temenggong Dato Vincent Lau madah, unit tu deka ngangkatka agi tikas pemujur palan nya.
Ku iya, tuju penumbuh unit tu ngambika muntang agi tumu nemu penyakit tungkul sengayuh nengah pengawa meresa pengerai kelimpah ngembing mensia mayuh ngemeratka pendiau pengidup bepengerai.
“Kitai gaga ati enggau penumbuh unit tu ngambika ulih nyaup kitai meri servis ke manah agi ngagai orang ke sakit.
“Gerempung kitai ukai ngira penguntung tang nyaup mensia mayuh napi penyakit tu ti ukai semina meri servis ngagai mensia mayuh di Sibu aja tang mega serata nengeri Sarawak,” pia ku iya madah maya pengawa bejadi unit nya ditu, lemai kemari.
Lau mega maya tu madahka SKF deka nandu kerejasama enggau piak ti bekaul kelimpah mensia mayuh ngambika tuju gerempung sida ulih dikemujurka enggau lantang agi.
Bela bisi datai maya tu iya nya Residen Sibu Hii Chang Kee, Kapitan Datuk Janet Lau, Direkter SKF Ivy Lau enggau Direkter Sepital Sibu Dr Ngian Hie Ung.
Naka ke diatu bisi 38 iku orang ke berubat ba palan nya.