MIRI: Sarawak dipelabaka deka bulih agih belanja ke besai dalam Bajet 2016 ke deka dibantaika Menteri Besai,Datuk Seri Najib Tun Razak kena 23 Oktober tu ungkup pengelantang pendiau rayat.
Kaban Kunsil Nengeri (ADUN) Telang Usan, Dennis Ngau madahka sebaka enggau iya ke udah-udah, Sarawak udah teulihka belanja besai dikena bejalaika pemansang infrastruktur kelebih agi ba kandang menua pesisir.
“Aku ngandalka rambau pengawa mantaika Bajet 2016 tu ila, dia Menteri Besai deka ngemendarka mayuh agi agih belanja ungkup Sarawak dikena ngemansangka kandang menua pesisir ke mega nyadi pemerat perintah nengeri tu,” ku iya lebuhka dirandau ba Kuching, apin lama ke udah.
Dennis madahka perengka guna infrastuktur baka jalai alun, bekal ai beresi enggau elekterik ba kandang menua pesisir mengkang nyadi pemerat perintah nengeri.
“Nengah pengawa nurunka kuasa perintah besai ngagai perintah nengeri, aku andal ati iya deka meri pangka ke besai ngagai Sarawak kelebih agi dalam bejalaika projek perengka guna asas,” ku iya.
Ku iya nandu baru, piak iya udah nganjung peminta ngulihka belanja dikena bejalaika projek ti diadang deka mai pemaik ngagai rayat.
“Pengarap kitai iya nya semua projek ti udah diperambu dalam Bajet 2016 kelebih agi ba kandang menua pesisir dipejalaika enggau manah ungkup raban ke diselinting,” ku iya nerang.
Ba dalam rekod ku iya, konstituensyen Telang Usan udah nerima agih belanja nyauka datai RM200 juta dikena bejalaika projek lalu iya ngarapka kandang menua nya deka nerima agih belanja ke besai agi udah tu.
Kenu ku iya, Bantuan Rakyat 1Malaysia (BR1M) mega dipelabaka deka dikaul dalam pengawa mantaika bajet lalu nya seiti ari pengawa bebendar perintah mantu ngelempungka tating belanja rayat.
“Aku ngarika rayat ba kandang menua pesisir meri besai terima kasih ngagai perintah besai ke udah bejalaika BR1M ke udah mai pangka mantu ngelempungka tating belanja raban orang kurang penatai pemisi,” ku iya.
Penyampau BR1M dalam taun seiti tu ila deka ditambah ungkup semua renggat raban penerima bepelasarka pemisi belanja menua tu.
Perintah meri nambahka penyampau bantu tu dikena mantu rayat nampung ungkus belanja pengidup ke majak niki.