Apai indai patut seruran ngemataka ulah anak maya bekenaka media rama ba internet
SRI AMAN: Sapit Menteri Dalam Menua, Masir Kujat ngelalau bala apai indai ngambika seruran ngemataka ulah anak maya bekenaka perengka media rama ke bisi ba internet.
Kenu ku iya, kebuah pia laban enti sala guna media rama ulih meri pangka negatif ngagai pemansang pendiau rayat.
Iya madah, nembiak ke maya hari tu kelalu mudah bulih perengka telekomunikasyen moden lalu tu ngemuntangka sida nguna aplikasyen baka WhatsApp, instagram, Facebook enggau ke bukai.
“Tu ngemuntangka sida tepedaka elemen negatif nyengkaum jaku ajum ke bejai perintah Barisan Nasional (BN) ba media rama nya,” ku iya.
Masir ke mega nyadi Kaban Parlimen Sri Aman madah munyi nya nengah jaku iya ke dibacha Mandal Khas iya, Edmund Pirang rambau Pengerami Karnival Akademi Sekula-Sekula Zon Pantu bepalan ba Sekula Primari (SK) Pantu ditu, apin lama ke udah.
Nangkan nya, iya madah raban nembiak patut diajar nguna media rama enggau chara ke betul baka ngiga tauka bekunsi penemu dikena ngemanahka tikas pelajar ba sekula, ku iya.
“Guna perengka tu enggau chara ke betul iya nya enggau tuju ke manah ukai dikena ngutuk orang bukai tauka ngiga penerang ke negatif,” ku iya.
Bela bisi diatur rambau program karnival sekula ti iya nya pekit nusui cherita, belagu, tanda tradisional enggau bejaku ba mua mayuh.