SRI AMAN: Polisi 1Murid 1Sukan (1M1S) Opis Menteri Pelajar Malaysia (KPM) netapka genap iku nembiak patut pengabis nadai nyereta sebengkah aktiviti lumba tauka main di sekula kena nyukung pengawa dipejalaika Falsafah Pendidikan Kebangsaan ti ngemeratka pengawa nempa modal mensia ke nadai penimpang ari segi intelek, rohani, emosi enggau jasmani.
Menteri Muda Pemansang Menua Pesisir enggau Pengawa Berumah Sarawak, Datuk Francis Harden Hollis madah, bidang lumba tu beguna bendar dalam mengoptimumka pengulih fizikal nembiak setipak enggau penempa pengeregas runding nya bepanggai ba tikas pengerai selangkuh tubuh.
“Dalam kontek tu, bidang lumba beguna bendar dalam ngadaka mensia ke gerai, regas, sereta produktif ngambika ulih nyaup dalam pengelantang rama enggau pemansang ekonomi menua,” ku iya.
Iya ke mega Kaban Kunsil Nengeri (ADUN) Simanggang mantaika jaku ku rambau bejadika Lumba Ninting Taun, Serakup Apai Indai enggau Pengajar (PIBG) Sekula Primari (SK) Nanga Skrang semak ditu, kemari.
Aktiviti lumba dipejalai kena narit ati nembiak ngambika sida ngemeranka gaya pengidup bepegerai sereta aktif. KPM lalu bejalaika 1M 1S dikena nentuka genap iku nembiak ngasaika pemaik nyereta pengawa lumba lalu ngarapka iya ulih nempa raban nembiak rebak baru ngemeranka pengawa lumba nyerumba peminta ba akademik.
“Pekara tu beguna amat lalu patut diberi pemerat ngagai ngenap renggat komuniti taja dalam pengiruh kitai napai macham penanggul pengidup, kitai enda patut ninggalka pemerat dalam pengawa lumba,” ku iya manta.
Beduduk ari nya ku iya, dikena nyapai pemujur kelebih agi dalam sesebengkah bidang, pengawa lumba ba renggat ke tinggi agi, nyata begunaka kerejasama enggau sukung ari semua piak, nya alai megai pengawa nyadi pengajar ngelatih tentu nyediaka perambu sereta bejalaika iya jauh tumu agi ari kontigen ke bukai ngambika iya ulih nyapai pemujur lebih ari iya ke bukai.
“Reti ba jaku ke bukai, pengawa ke ngelui ari orang nya ngembuan peluang ke mayuh agi ngagai tim kitai deka nyapai pemujur nengah pengawa tu,” ku iya.
Bela bisi datai, Pemesai Opis Pelajar Pelilih Mit Sri Aman, Vivien Mujah, Pemangku Kepala Pengajar, Eu Ho Kwong sereta Yang Dipertua PIBG, Romeno Tugang.
Nyempulang pengerami nya mega, Harden bisi ngemendarka agih belanja penyampau RM 10,000 ngagai PIBG sekula nya ngambi bisi dikena bejalaika aktiviti sepanjai taun 2016.