Dikarang Judan Bungap//
TERIMA KASIH DAYAK: Najib enggau (ari kiba) Masing, Abang Johari sereta Ugak nuatka lengan kelai temegah ati ke sukung raban bansa Dayak.
Penembu jalai nya ila, ukai semina ulih ngubah pengidup peranak menua tang mega pelilih Kapit
KAPIT: Perintah udah ngemendarka RM87 juta kena nembuka jalai ari Nanga Ngemah nuju Nanga Temalat, sebengkah ari projek Jalai Kanowit/Song/Kapit.
Menteri Besai Datuk Seri Najib Tun Razak madah, penembu jalai pemanjai 9.6 kilometer tu ila dikearap ulih ngubah Pelilih Kapit dijantil ngagai sitak bukai nengah jalai alun.
“Ba projek Jalai Kanowit/Song/Kapit bisi ‘missing link’.
“Penanggul tu nyadi ba projek jalai ari Nanga Ngemah ngagai Nanga Temalat.
“Kitai ngungkupka RM87 juta dikena nembuka penanggul tu,” ku iya.
Sebedau tu, ‘missing link’ tu suah nyadi isu ketegal dipadahka nanggul pemujur projek Jalai Kanowit/Song/Kapit.
Iya mantaika jaku tu maya bejadika Pengerami Ngiling Tikai Gawai Dayak 2015 ba Rumah Bengau, Nanga Sut, Baleh ditu, kemari.
Bela bisi datai maya tu iya nya Menteri Pemansang Pengawa Berumah Datuk Amar Abang Johari Tun Abang Openg ti ngarika Kepala Menteri Datuk Patinggi Tan Sri Adenan Satem, Menteri Pemansang Tanah ti mega Chairman Komiti Pengerami Tan Sri Datuk Amar Dr James Jemut Masing, Menteri ba Opis Menteri Besai Datuk Joseph Entulu, Sapit Menteri Pemansang Menua Pesisir enggau Kandang Menua Datuk Alexander Nanta Linggi, Menteri Muda Main Asal Liwan Lagang, Kaban Parlimen Ulu Rejang Datuk Wilson Ugak Kumbong enggau bala pemesai bukai.
Kelimpah ari nya, Najib mega madah, perintah ngemendarka ungkus RM37 juta kena nembuka projek Jalai Sungai Banyau ngagai Sungai Mujong.
“Aku meda jalai ke digaga ba projek tu ngena standard ke manah lalu rayat ditu endang patut diberi jalai ke manah,” ku iya bejaku ba mua urung 5,000 iku mensia ke datai maya nya.
Menteri Wang tu mega madah, Kapit udah tu ila deka ditumbuhka sebuah sekula Vokasyenal.
Ku iya, sekula tu ila deka mutarka penanggul raban nembiak ba sitak tu tusah ngulihka pengawa ti menyana.
Ba pekara bukai, Najib madah, perintah balat ngemeratka pemansang nengeri Sarawak sebaka enggau nengeri bukai di Malaysia.
Iya madah, Sarawak ngembuan mayuh potensi dikemansangka lebih agi ketegal ti ngembuan kuasa hidro.
“Kitai ukai semina meda potensi tu aja tang bebendar deka bejadika potensi tu ngambika ulih ngemansang nengeri Sarawak enggau serata Malaysia.
“Nengah Langgur Pemansang Malaysia Lumpar Ke-11 (RMK11), perintah enggau prinsip Barisan Nasional (BN) deka bebendar ngangkatka pemansang di menua pesisir lalu enda bechiping ngintu tikas pengelantang pengidup rayat,”ku iya nandu.
Ngenang pengerami ke diatur sehari nya, Najib temegah ati enggau penatai raban bansa Dayak ti tampak ngayanka sukung ba iya.
Iya pechaya raban bansa Dayak ngeringka sukung ngagai perintah BN bepun ari udah nemu tuju pelin pemansang ke dibai iya ti diungkup ngagai semua raban bansa enda milih ba menua pesisir tauka kandang mengeri.
“Nya alai, aku deka suah agi datai nemuai betemu enggau rayat di Sarawak tu ngambika prinsip BN ulih ngelekai kena numbuhka pemansang di nengeri tu,” ku iya.