Ngambika pemansang di Parlimen Sibuti seriris enggau Langgur Pemansang Malaysia Lumpar Ke-11
MIRI: Opis Menteri Pemansang Menua Pesisir dikearap melakin 3,000 kilometer jalai alun di menua pesisir dalam Parlimen Sibuti seriris enggau Langgur Pemansang Malaysia Lumpar Ke-11 (RMK11).
Kaban Parlimen Sibuti Ahmad Lai Bujang madah, baka lima taun ti sebedau tu, pengawa melakin jalan alun nya udah dipejalaika perintah tang mengkang mayuh jalai ti deka dibelakin.
“Semina pengawa ngemanah ba kandang menua Sepin Sepupok patut dipejalaika lengkas ngambika meri pemaik pentai pemisi ngagai 20 buah rumah panjai kelebih agi dalam sektor ekonomi,” ku iya lebuh bejuraika RMK-11 di Dewan Rakyat malam ensanus.
Iya mega mantaika langgur penemu ngambika perintah enggau Petronas meri Sarawak 10 nyentuk 20 peratus agi tetiap ‘new block’ tauka ‘new fuel’ ti dipejalaika kompeni gis enggau minyak nya.
“Kami arapka Sarawak bulih ngelui lima peratus ari asil pemansut minyak ti dipejalaika kompeni minyak baka ti dipinta perintah nengeri,” ku iya.
Maya penemuai Menteri Besai Datuk Seri Najib Tun Abdul Razak ke Sarawak apin lama tu tadi, penemuai iya bisi meri pemansang positif lebuh iya setuju sereta nyukung peminta Sarawak.
“Kepala Menteri Datuk Patinggi Adenan Satem nadai leju minta ngambika 20 peratus ari asil minyak nya diberi ngagai Sarawak,” ku iya.
Iya mega minta Opis Menteri Pengawa Berumah enggau Kandang Menua (KPKT) nerangka status ngaga Balai Bomba di Sibuti ti patut udah berengkah digaga tengah taun siti nyin tadi.
“Aku pechaya bisi penanggul teknikal ba langkar pelin nya lalu arapka opis menteri ulih madahka kebuah projek nya laun digaga,” ku iya.
Ahmad Lai mega ngelaluka pelin perintah RMK-11 ti deka ngemanahka Sepital Miri, setipak enggau status Miri nyadi bandar raya kedua di Sarawak.
“Miri ukai semina diuan peranak menua tu aja tang mega bala staf kompeni minyak enggau gis ari menua tasik, lalu kami pechaya nya ulih nyaup mai mayuh agi pemansang ungkup menua Miri,” ku iya.