KUCHING: Sekeda peranak menua ke nguan kandang pendiau Lorong Song 1G, Tabuan Heights mansutka pengirau ati diri ba ulah bechurika utai ba kandang endur dia lalu enggau nya ngansak polis suah agi nginau seraya bejalaika pengawa matau.
Nundaku sekeda sida ke mangkang endur nya, kereban baka kasut, bateri kerita enggau keresa kena bekebun lebang ari belakang rumah kenyau beberapa minggu ke udah.
Seiku peranak ke nguan menua nya, enggai madah nama diri bisi tepedaka dua iku penchuri bechurika tutup besi ba lurung belakang rumah sida.
“Sida enda takut ke aku. Sida mabak tutup besi nya bejalai mansa aku, taja pan aku ngasuh sida mulaika nya baru ba empat asal,” ku iya.
“Anak lelaki aku bisi meda sida nyirut gam enda jauh ari tu,” ku iya ngerandau The Borneo Post kemari.
Ku iya bala nembiak tu suah datai ngena mutosikal ke tuai nya bebelas taun umur disempulang sida ke mit agi.
“Sida iya ngengkah mutosikal ba tisi jalai udah nya lalu matau utai ba belakang rumah. Aku mega kala meda sida bejelangkit atas pagar beberapa kali enchuri utai dalam rumah.
“Ulah tu nyadi antara pukul 8.00 pagi ngagai 12.00 tengah hari laban tu maya orang agi benung ba tempat kereja tauka di sekula.
“Aku arapka polis suah agi bejalaika pengawa nginau seraya matau ba kiandang pendiau nya kelebih agi siang hari,” ku iya.