LIKUN BA PENGERAI: Salang (dua kiba, rintai belakang) enggau bala nembiak SK Nanga Meluan sereta bala pemesai ke bukai maya nguji ngirup ai ari projek bekal ai sekula nya.
JULAU: Urung RM4 miliun udah dipelanja Kaunsil Penyanding Penemu 1Malaysia Sarawak (1MSAC) ngatur 28 bengkah projek pemansang rama berengkah bulan Jun tu tadi lalu disadang deka tembu magang ujung taun tu.
Chairman 1MSAC Datuk Joseph Salang Gandum madah, projek ke diatur ari baruh program rama iM Sarawak tu mungkur menua Julau, Limbang, Mas Gading enggau Miri kelimpah menua pesisir di Lusong Laku di Belaga enggau Long San di Marudi.
“Projek tu nyengkaum projek bekal ai, kuasa karan, bantu barang pemakai, pemansang pengelandik enggau projek betanam betupi, pelajar, lumba enggau main sereta projek nyeruri rumah lalu deka mai penguntung ngagai lebih 30,000 iku rayat ba menua pesisir Sarawak.
“Program pemansang rama tu diatur begulai enggau Yayasan Rayat 1Malaysia (YR1M) enggau Yayasan 1MDB (1Malaysia Development Berhad) ti digelar kitai Program iM Sarawak,” ku iya.
Iya mantai penerang tu maya berandau enggau pengarang berita sepenembu bejadika Projek Bekal Ai Beresi enggau bejadika iM Sarawak di Sekolah Kebangsaan (SK) Nanga Meluan ditu, kemari.
Sama bisi datai ngulu pengerami tu iya nya bala Komiti Besai 1MSAC baka Hasbi Habibollah ti mega Kaban Parlimen Limbang, Nogeh Gumbek ke mega Kaban Parlimen Mas Gading, Datuk Billy Abit Joo, Ir Irwan Zulkarnain Muhammad Hasbie, Pemesai Kajibumi, Opis Mineral enggau Geosains Sarawak Sulong Enjop, Kepala Pengajar SK Nanga Meluan Thomas Legak enggau Chairman Gerempung Apai Indai enggau Pengajar (PIBG) SK Nanga Meluan Nabau Laja.
Ngenang projek nanam padi ba Lusong Laku, ku Salang, naka ke diatu 133 ruang bilik ke nerima projek nya benung besaup nasau 50 hektar pemesai tanah.
“Projek tu diungkup ngagai raban bansa Penan lalu kitai semina meri bantu belanja aja tang meresi tanah enggau nanam tepulai ngagai sida empu,” ku iya sambil madahka rayat menua nya berasai temegah ati nerima bantu nya.
Salang madah, tiap bengkah projek ke diatur kunsil sida dikereja begulai rayat ke nerima projek nya empu.
“Kami semina meri bantu belanja aja lalu projek nya ditembuka rayat empu kelimpah bisi kerejasama ari ijinsi perintah ke bukai.
“Ijinsi perintah tu nyengkaum Opis Pelajar Nengeri Sarawak, Opis Mineral enggau Geosains Sarawak, Opis Menteri Pemansang Betanam Betupi kelimpah opis ke bekaul ke bukai,” ku iya.
Dulu agi ari nya, Salang maya bejaku ba mua bala mayuh madahka iya temegah ati enggau ulah apai indai ulih besaup nembuka projek bekal ai sekula nya.
Ku iya, projek nya dipenyadika begulai enggau Opis Mineral enggau Geosains Sarawak kelimpah bala apai indai nembiak sekula nya empu.
“Sebedau tu, kitai bisi dipadahka, bala pengajar enggau nembiak napi penanggul senentang bekal ai ke nyadi urung tiga kali seminggu.
“Nya alai, nengah projek bekal ai beresi ari baruh program iM Sarawak tu, kitai ngarapka penanggul tu enda nyadi agi lalu bala nembiak enggau pengajar ulih ngemeratka agi pekara pelajar,” ku iya madahka baru.