MIRI: Opis Pengerejister Bansa (JPN) nyemetak madah, piak sida nulak peminta Gagah Brundang, 55, ari Tijar Baram ari ngembuan kad pengelala (Mykad) atas kebuah ke tegap.
Pemesai Servis Penguna JPN, Siti Aishah Hussain madah, sida nulak peminta Gagah ungkup Mykad ke dipadah nengah surat referens P17335.
“Lebuh meresa rikut opis nemu nadai dokumen tegap dibantai dikena ngayanka pengada orang ke minta tu lalu bisi tetemuka sekeda pekara ke bebalut bepelasarka penerang dalam interbiu,” ku iya dalam penerang media ditu bedau lama ke udah.
Siti Aishah madahka, dawa kad pengelala pengereput ke udah angus maya rumah sida nya angus mega enda disebut maya ngaga peminta baru.
“Asil ari peresa kami mega tetemuka chap cari pengeriput mega enda sebaka enggau rikut kad pengelala plastik ke didawa enggi pengeriput.
Nitihka iya, piak JPN Miri nguji bekangau enggau pengeriput nengah telefon sebedau tu ngambika ngupas pekara tu tang puntan.
“Pengeriput dilalau mansang ngagai barang bagi pampang JPN ngambika minta baru lalu mantaika bukti pengada ke kukuh,” ku iya.
Ba dada Utusan Borneo 10 Disember tu tadi, Gagah Brundang madahka diri udah nganti semak 10 taun lepas ke minta MyKad tang ditulak JPN.
Asal ari Rumah Ricky Marai, Nanga Lait, Tinjar di Baram, kad pengelala asal Gagah ke lama udah angus maya rumah panjai sida angus dalam taun 2003 (maya nya Rumah Ramba).
Iya datai ngagai opis The Borneo Post enggau Utusan Borneo madahka ukai semina kad pengelala iya aja angus maya nya tang mega dokumen iya ke bukai mega sama angus.
“Berindik ari nya aku ngaga riput polis di Balai Polis Pusat Miri kena 2003 lalu udah nya diasuh ngaga kad pengelala baru di JPN Pelilih Miri,” ku iya.
Tang pengarap tudah ke deka ngembuan kad pengelala baru puntan lebuh iya dipadahka chap jari sepiak iya enda sebaka enggau ke dulu suba.