KUCHING: Opis Menteri Pengintu Pengelantang, Pekara Indu enggau Pemansang Ruang Bilik deka beteladanka menua Jipun ti nyendiaka pangking mit ba palan ngarau endur orang ti tasah nyengkaum penusah bah tauka angus.
Menteri nya, Datuk Fatimah Abdullah madah, pekara nya deka diperunding sereta dipansik sebedau dikemeran ngambika taungelantangka orang tasah.
Iya madah, pemar nyendiaka bilik mit nya ukai nyadika penanggul tang pengelantang patut dikemerat.
Malam kemari (ensanus) maya makai malam enggau temuai ari menua Jipun, bisi seiku orang Jipun nganjung gambar nengah Facebook, ba menua Jipun palan pemindah orang tasah disediaka baka pangking mit, dibandingka enggau kitai ditu nadai besapat sereta tebuka magang, ku Fatimah.
“Aku ngasaika chara nya (nyendiaka pangking mit) patut dipansik, dikena ngangkatka pemanah pengelantang orang tasah ba palan ngarau sekalika ketegal penusah bah tauka angus sereta macham tasah bukai.
“Pangking mit nya patut likun ba genap ruang bilik lebih agi ngagai indai nembiak mit ke benung nusu ke anak sereta lebuh sida begari.
“Ungkus nya engka lebih tinggi tang enti kitai berundingka pengelantang orang ti kena tasah nya, aku ngasaika tu patut dikemeratka,” ku iya seraya madah, naka ke diatu menua tu nadai ngaga tauka nyendiaka bilik mit.
Nambahka nya, lebuh ditanya bekaul enggau penyikap opis menteri iya betapi enggau musim landas tauka pengujan ti mai penusah bah, iya madah, Opis Pengintu Pengelantang Raban Bansa dibaruh kuasa opis menteri iya udah nyikap diri.
Fatimah madah, opis menteri iya nyendiaka pemakai, palan pemindah, pengangkut dikena nganjung pemakai sereta ke bukai ti bekaul.
“Nyemaka bisi penusah bah nyadi kami deka nganjung pemakai, ngatur endur palan pemindah nyengkaum ngenukuka pemayuh orang ti kena tasah ngambika bantu baka panggal, pua enggau penyampau pemakai ti dianjung chukup.
“Nambahka nya ngatur senetang pekara bekaul enggau pemeresi, pengelikun enggau gintir berapi ba palan pemindah nya,” ku iya lebuh dikerandau pengarang berita ba sebengkah pengerami ditu kemari.