LUNDU: Sepenyampau 5,841 kes enda ngerejister pengada ti dirikut di nengeri tu enda bangat ngirauka ati, ku Sapit Menteri Dalam Menua Datuk Dr Wan Junaidi Tuanku Jaafar.
Iya madah asil ari program pemansik ke deka diatur Opis Pengerejister Bansa (JPN) di Sarawak disadang enda manggai 20,422 kes baka ke dirikut di Sabah.
Wan Junaidi ke mega Kaban Parlimen Santubong ngansak JPN nembuka tanggungpengawa sida ngambika opis menteri ke dikuasa iya nemu pekara ke endar lalu netapka bagi atur ti patut dipejalai.
“Kitai enggai ngelakka isu laun ngerejister tu majak nyadi. Kitai patut nganjung tim ngagai serata menua pesisir lalu semina nengah chara nya kitai nemu penyampau ke endar.
“Naka ke diatu, sepenyampau 6,000 kes enda ngerejister pengada ditemu ba Sarawak tang aku nyadang penyampau kes deka mayuh agi ari nya enti pansik tembu diadu. Tajapia aku enda nyadang penyampau kes nya bela enggau kes di Sabah,”ku iya maya dikerandau pengudah nyuaka bantu chek MRP ba sebengkah pengerami ditu, kemari.
Ba pengerami nya, sepenyampau RM107,000 diagih ngagai 27 gerempung dalam kandang menua Tanjung Datu.
Bansa Iban ngerikut kes pemadu mayuh iya nya 3,528 kes lalu ditangkanka Melayu (677), China (302), Melanau (170) sereta Bidayuh (167).
Ba Malaysia, anak mit ke enda direjister dalam timpuh 42 hari dikira laun direjister.