KUCHING: Opis Imigresen Malaysia (JIM) Sarawak chakah bejalaika program pemansang penyungkak fasiliti enggau kapasiti pengawa meresa orang ke tama enggau pansut ari nengeri tu ba pintu penama di garis antara menua, kena nyeliahka insiden penyelawai.
Direktor JIM Sarawak, Datu Robert Lian madahka, nya dikena nyeliahka insiden penyelawai nyadi di Sarawak baka ke nyadi di Lahad Datu.
Iya madahka, JIM di Sarawak deka terus sejalai enggau pinta perintah ba pengawa ngenukuka pengelikun menua dijaga lebih agi di menua ulu tauka pesisir ke semak garis antaramenua.
“Aku arap bendar program pemansang ti deka ngangkatka pemanah fasiliti enggau kapasiti pengawa meresa di pintu penama Imigresyen nya setipak enggau pemendar perintah deka nyeliahka insiden penyelawai nyadi di Sarawak baka ke nyadi di Lahad Datu apin lama.
“Berindik ari pekara nya, diatu projek mikro KDN (Opis Menteri Dalam Nengeri) di Bario ti berega RM18.6 juta udah tejapaika 10 persin tembu lebih tiga persin dulu ari timpuh.
“Projek ngaga pintu penama Imigresyen di Ba’Kelalan, Lawas enggau Serikin, Bau mega deka dipasukka ke dalam Rolling Plan Ke-empat dalam Langgur Pemansang Malaysia Lumpar Ke-10,” ku iya.
Robert mansutka pekara nya dalam jaku pengelalu iya ba pengerami nyuaka Anugerah Perkhidmatan Cemerlang (APC) Opis Imigresyen Zon Sarawak 2012, ti diatur ba Auditorium, Bangunan Sultan Iskandar ditu, pagi kemari.
Nitihku iya, ba taun 2012 bisi lebih 13 juta orang ke tama enggau pansut nengah pintu penama Imigresyen ke diperesa dibandingka enggau 12 juta iku ba taun 2011.
“Berengkah 3 Januari 2012 kitai bejalaika pengawa di Ba’Kelalan, diperatika penyampau pukul rata orang ti tama sereta pansut nengah Ba’Kelalan nya nyentukka ngagai 4,000 iku tiap bulan.
Lebuh ti ngenang APC iya madahka, bisi 95 iku pegawai ari 1,269 iku pegawai Opis Imigresyen Malaysia (JIM) Sarawak nerima Anugerah Perkhidmatan Cemerlang (APC) Zon Sarawak 2012 ditu kemari (ensana).
Ku iya, gelar ke diberi nya dikena masa sereta meri terima kasih ngagai pegawai ti nyulut sereta bisi kualiti maya bejalaika tanggungpengawa.
“Ngarapka udah tu semua penerima APC terus nunjukka penyulut senipak enggau pegawai ti bepenyulut, ke nadai bechiping, bisi integriti sereta bekualiti tinggi, ngemeranka ulah ti menyana endang aset besai sesebengkah institut tauka ijinsi nentuka penegap engga releven servis ke dipejalaika,” ku iya.
Pengawa nya kemari dipenyadi sereta gelar disuaka Kepala Pengarah JIM, Dato Alias Ahmad.