MIRI: Seiku lelaki buta ke diau enggau sida sebilik di Rumah Mesra Rakyat Tudan udah nerima pemeri leka benih sayur enggau jagung sereta baja ungkup iya bekebun di belakang rumah.
Pemeri nya disua Sapit Menteri Penyambung Datuk Lee Kim Shin ngagai Jackson Mangai ke udah mantu begigaka orang meri barang nya ngambika nyungkak penatai pemisi sida sebilik.
“Tu sebengkah chara mantu Jackson sebilik ngidupka diri ketegal iya ke enda lansik. Seduai melaki bini tau betanam sayur enggau jagung ke empa diri enggau mega ke belanja,” ku Lee.
“Sida Jackson sebilik endang udah bisi bekebun di belakang rumah lalu udah mega minta baja ungkup kebun.
“Aku arap enggau leka utai sereta baja ke diberi sehari tu nya ulih nambah penatai pemisi sida sebilik sereta ngelempungka tating pengidup ke diasai sida ngelama tu,” ku Lee.