KUCHING: Perintah nengeri patut mayuh agi ngeluarka puku dikena ngemansangka mudal mensia ngambika lebih bepenemu sereta bepengelandik ti ulih ngemajuka Sarawak jemah ila.
Sapit Menteri Besai, Tan Sri Muhyiddin Yassin madah, pemansang mudal mensia ba pengelandik enggau penemu pekara ti amat beguna sereta patut dikemerat dikena ngemansangka nengeri tu.
“Pengawa ngemansangka mudal mensia ba rayat Sarawak sebengkah pekara ti enda tau enda dikemerat sereta dipejalaika, kitai (Sarawak) bisi mensia tauka nembiak ke ulih dilatih ngulihka penemu enggau pengelandik, kelimpah ari ti bisi penyukup ba penatai pemisi tauka pengeraja asal.
“Nya alai aku meri penemu, endang amat dikemerat kitai ngeluarka puku dikena ngemansangka mudal mensia, ngelatih nembiak ngambika bepengelandik sereta bepenemu dalam bidang pelajar awakka sama besaup ngemansangka Sarawak sereta Malaysia dudi hari,” ku iya.
Muhyiddin mansutka pekara nya lebuh bejaku ba pengerami Ramah Tamah Aidilfitri ti diatur perintah nengeri di Borneo Convention Centre Kuching ditu, malam ensanus.
Nambahka nya iya madahka, nengah Pelin Pelajar Malaysia 2013-2015, tikas pelajar menua nyengkaum Sarawak deka diangkatka ngagai tikas penyulut ti tinggi agi.
Taja pan nengeri tu ngembuan pemayuh nembiak ti teulihka penyulut sereta nampung pelajar ba Institut Pelajar Tinggi, tang ku iya, nya bedau chukup ke bekal ngemansang Sarawak jemah ila.
“Juluk kitai deka ke pelajar menua entara pemadu manah di dunya.
Tu meh deka dipejalaika dalam timpuh beberapa taun ti deka datai,” ku iya ti nyadi Menteri Pelajar enggau Pelajar Tinggi.
Kelimpah ari nya iya muji penyulut tauka pemansang nengeri tu dalam kandang 50 taun ke udah.
Iya arap bendar pemujur pemansang ke dipejalaika di Sarawak asil ari sukung, penyereta enggau kerejasa entara perintah, menua enggau semua renggat raban bansa.
“Dalam timpuh 50 taun ke udah, Sarawak endang mayuh udah berubah dibandingka enggau suba (sebedau merdeka) lebih agi pemansang dalam infrastruktur baka sekula, bekal ai beresi enggau kebukai.
“Taja pia kitai enda ngenggaika agi bisi sekeda endur ti bedau datai pemansang nya, tang seagi polisi enggau pemesai perintah Barisan Nasional disukung dia pengawa pemansang deka majak dipejalaika.
“Udah tentu 50 taun ti deka datai Sarawak deka lebih maju ari ke udah,” ku iya seraya ngarapka Sarawak lebih nyulut di Malaysia.
Bisi datai sama ngulu pengerami nya malam ensanus, Sapit Kepala Menteri Datuk Patinggi Tan Sri Alfred Jabu Numpang ti ngarika Kepala Menteri Pehin Sri Abdul Taib Mahmud; Menteri Pemansang Tanah, Datuk Dr.
James Jemut Masing; Menteri Kunsil Kandang Menua enggau Pemansang Raban Bansa, Dato Sri Wong Soon Koh; Menteri Pengatur Pemansang Pengeraja Asal enggau Rampa Menua II, Datuk Amar Awang Tengah Ali Hassan; Menteri Pengawa Berumah, Datuk Amar Abang Johari Tun Openg sereta bala menteri enggau menteri muda kebukai.