KUCHING: Projek ‘Gateway Tower’ – Indu Opis Gerempung Pemansang Ekonomi Sarawak (SEDC) enggau Land Custody and Development Authority (LCDA) nyadi ikon pemadu baru ‘Green Central Business District’ di Isthmus ditu.
Kepala Menteri, Pehin Sri Abdul Taib Mahmud madah, perintah seruran deka nyukung pengawa ngerembai sereta ngemansangka Isthmus ti udah dipesetujuka nyadi Green Central Business District.
Kebuah pia ku iya laban nya palan ti pemadu manah sereta ngemuntangka semua pemansang pengawa dagang enggau ekonomi di Sarawak, ti ulih narit pemeranak puku masuk ke mengeri tu.
Ari pun aku udah minta ngambika Istmus tu disimpan sereta diungkupka nyadi pasar baru sereta palan dagang baru di Kuching, ku iya.
“Laban nya (Isthmus) ulih ngempuru sereta ngemuntangka semua pengawa ari adap utara baka pelabuhan, indu opis di Petra Jaya, Kuching Lama, Samarahan lalu besambung enggau padang bilun.
“Isthmus tu pemadu senipak nyadi Green Central Business District laban ulih ngemuntangka semua pemansang pengawa dagang enggau ekonomi di Sarawak.
Lalu ari tu kitai ngadang mayuh agi kompeni enggau pengawa dagang ke bukai deka muka opis di Kuching nyangkaum bekaul enggau pemansang baru di SCORE.
“Tuju pengawa pemansang tu iya nya ngambika rayat idup enggau lantang ukai semina deka nyadi kaya aja,” ku iya.
Taib bejaku ba pengerami nasih tanah ‘Gateway Tower’ – Indu Opis SEDC enggau LCDA, ti diatur SEDC enggau LCDA ba Borneo Convention Centre Kuching ditu, pagi kemari.
Nitihku iya, apin lama Cahaya Mata Sarawak (CMS) mantaika perambu ti deka dipejalaika ba Isthmus, ti nyengkaum langkar universiti, rumah betikas tinggi ti ngemeranka pemanah rampa menua, endur puang, padang main ragbi enggau bol.
“Utai ti deka dikereja kitai iya nya ngaga bandaraya ti endang diungkupka rayat ukai semina bandaraya ti bisi rumah ke memanah aja.
“Aku meruan nyukung pelin ti ngansak rayat mansang enggau niat manah agi, bisi pengerindu ke adat enggau main asal, literature sereta semua pekara ti ngemansangka runding enggau ngangkatka taban mensia ti manah agi,” ku iya.
Iya endang ngarapka mayuh agi pasar bukai di nengeri tu ulih berubah nyadi bandaraya ti ngemeranka pemanah rampa menua enggau pengaga ngagai mensia.
Projek Indu Opis LCDA enggau SEDC ti digaga dalam timpuh 24 bulan nengah kerejasama entara CMS enggau SEDC dipelabaka kededua indu opis nya sama nguna ungkus belanja RM76 milliun.
Bela bisi ngulu pengerami nya kemari, Menteri Muda Dagang Temuai ti mega Chairman SEDC Datuk Talip Zulpilip; Menijer Besai LCDA Datu Dr.
Sulaiman Husaini; Sapit Kepala Menteri Datuk Patinggi Tan Sri Alfred Jabu Numpang enggau ke bukai.