SIBU: Tinggal sehari da agi Malaysia deka nyambut Hari Merdeka ke-56, tang resu nyambut hari penuh sejarah nya agi kurang diasaika ba rumah-rumah panjai.
Bisi sekeda rumah-rumah panjai agi bekerendut dada nadai ngitang tambai baik ke nya Jalur Gemilang tauka tambai nengeri, ke patut digitang sepemanjai Kimpin Ngitang Jalur Gemilang nyentuk ke tengan bulan September.
Ulah ke baka tu dipelabaka ketegal peranak rumah panjai ba menua pesisir kurang semengat talukka menua tauka mega laban sida ngembuan chara kediri empu kena nunjukka semengat sayau sereta taluk sida ke menua.
Penghulu Richard Ampi ngaku pengawa ngitang tambai ba rumah-rumah panjai, nyengkaum ba genturung ” “ RICHARD AMPIpendiau Passai Siong agi kurang.
Taja pia, ku iya, nya ukai bereti peranak ba rumah panjai nadai ngembuan semengat patriotisme tauka talukka menua.
“Tuai-tuai rumah ba serata menua Sarawak sigi patut ngembuan semengat ke baka nya ngambika nembiak redak sida ulih nunda lalu sama-sama nyambut hari merdeka.
“Nyadi peranak Malaysia, kitai patut ngitang tambai sepemanjai bulan merdeka laban hari merdeka hari ke mai besai reti ngagai menua,” ku iya.
Richard madah munyi nya maya dipinta meri komen bekaul enggau kimpin ngitang Jalur Gemilang tauka tambai nengeri ke nadai tentu nerima sambut ba rumah-rumah panjai.
Ditanya kebuah peranak rumah panjai enda ngitang tambai laban tererunda udah ke meda rumah panjai bukai mega nadai ngitang tambai, iya madah nyangka nya seiti ari kebuah iya.
“Tang kitai enda ulih nerima ulah ti enda ngitang tambai tu laban rega tambai mar tauka nadai bajet kena meli.
Peranak rumah panjai ulih ngena duit JKKK kena meli tambai tu beseruyut.
“Enti ulih semua peranak rumah panjai mesti ngitang Jalur Gemilang tauka tambai nengeri sepemamjai kimpin sebulan tu,” ku iya seraya ngarapka perintah mega ulih ngagihka tambai ngagai peranak ba rumah-rumah panjai.
Kelimpah ari nya, ku Penghulu James Semilan, peranak rumah panjai patur bisi inisiatif kediri empu senentang kimpin ngitang tambai nyerumba bulan merintah diri tu, tang ukai nganti tambai ke diberi perintah.
“Anang nganti perintah meri tambai pechuma. Kitai patut bisi chara kediri empu kena meli tambai. Ungkup peranak ba rumah panjai, sida ulih nguna duit JKKK ba tuju nya.
Ku James, tambai ulih dibeli nengah rega RM5 nyentuk ke RM10, nitihka pemesai lalu ulih dibeli ngena chara pupuk kena ngelagu rumah panjai nyerumba bulan merintah diri.
Ku iya, tambai nya semina digitang sebulan sepemanjai Kimpin Ngitang Jalur Gemilang lalu udah nya ila tau ditaruh ngambika ulih dikena ba taun bukai.
“Taun tu kitai ulih meli sepuluh lambar udah nya taun bukai meli baru sepuluh lambar.
Nyau kelama-lama, penyampau nya ulih nambah,” ku iya seraya madah pengawa ngitang tambai ba sekeda rumah panjai ba Bawang Assan mega agi kurang.
Pia mega, ku iya, nembiak sekula ke seruran diiri enggau penemu merdeka ulih nyaup kimpin tu nengah atur minta raban apai indai sida enggau mensia mayuh ngambika sama-sama ngitang tambai.
“Kitai nemu nembiak sekula tu udah diri enggau penemu merdeka berengkah ari mit lalu sida ulih meri peransang ngagai apai indai enggau peranak rumah panjai ke bukai ngitang tambai.
Tandu James, tuai-tuai rumah mega patut nerang ngagai nembiak redak sida bekaul enggau reti merdeka nyengkaum ngelalau sida ngambika ngitang tambai nyerumba bulan merdeka.
Tu ku iya, dipelabaka ketegal agi bisi peranak ke enda tentu nemu reti bekaul enggau pekara tu laban semua tu semina didinga ari radio tauka tv aja.
“Tuai raban bansa ba sesebengkah genturung pendiau mega patut matau lalu beratika sesebuah rumah panjai nya bisi ngitang tambai tauka nadai.
“Berebak enggau nya, sida ulih meri peransang ngagai peranak rumah panjai nya ngambika ngitang tambai,” ku iya.