KUCHING: Perintah deka ngemeratka pemansang infrastruktur ngagai menua Sarawak dalam Bajet 2014.
Menteri Wang II, Dato Seri Ahmad Husni Mohamad Hanadzlah madah peminta Sarawak ke ngemeratka pemansang infrastruktur semampai dikenataika bala konsultasi agih belanja begulai enggai piak bukai sebedau tu.
“Sarawak antara nengeri ke beguna endar ba atur pemansang infrastruktur, kelimpah ari pekara bukai,” ku iya madah lebuh dikerandau pemberita sepengudah bejadika ‘Hari Terbuka Opis Menteri Wang 2013’ ti diatur ba Akademi Kastam Diraja Malaysia (AKMAL) pampang Sarawak ditu, kemari.
Ahmad Husni madah ari sukut penembu Bajet 2014, opis menteri udah mutarka konsultansi bajet ba semenanjung nyengkaum Sarawak enggau Sabah ke tembu minggu nyin tadi.
“Pemayuh memorandum ke diterima kami urung seratus lalu diatu kami benung dalam proses penudi ngaga fokus, alai kami bisi 15 tim fokus.
“Semina seiti aja ke bedau tembu, iya nya tim fokus ‘Happiness Index’ ke diberi kelala taun tu lalu diatu benung digaga, dipelaba tembu tengan bulan September tu ila,” ku iya.
Ba jaku iya dulu agi ari nya, Ahmad Husni madah belandikka konsep ‘One Nation, One Family’ opis menteri nya ukai semina deka bekunsi peneleba sida iya, tang opis menteri nya mega ngarapka timbal ari orang mayuh.
“Enti menua kita kaya, semua orang bekunsika pengaya nya.
Suba kitai tusah, kitai pan sama-sama bekunsika penusah nya,” ku iya.
Nya alai, ku iya, opis menteri nya ke nyadi palan ijinsi minta kerejasama orang mayuh nyengkaum sida ke gawa di opis perintah bekunsika peneleba sida iya ngemanahka agi opis menteri wang ke nyadi sebagi ari pengawa transformasyen.
Opis menteri nya opis ke keterubah iya di Malaysia ngaga program transformesyen ke udah nembuka renggat keterubah lalu diatu benung nembuka renggat kedua.
Iya madah taja pan pemansang ekonomi Malaysia taun tu nurun 4 persin, ari 5.6 persin (2012), tang enti dibanding enggau menua bukai, pemansang ekonomi menua tu agi tinggi.
“Dunya majak besemekih… Enti kitai enda angkat ngagai renggat ke tinggi agi, kita kena tinggal,” ku iya.
Ku iya, ari sukut ekonomi, gaya ekonomi dunya enda berapa manah enti diperatika ari GDP 2010 menua, pemansang semina manggai 2.9 persin, 2.6 persin (2011), lalu dalam suku keterubah diatu taun tu semina 1.9 persin.
Sama bisi datai ba pengerami tu kemari, Sekretari Perintah Menua Tan Sri Datuk Amar Morshidi Abdul Ghani, Sapit Ketuai Sekretari Opis Menteri Wang (Pampang Pengatur) Dato Nazirah Mahani, Sekretari Opis Perintah Besai Sarawak Datuk Yahaya Basimin enggau Pegawai Opis Wang, Opis Perintah Besai pampang Sarawak, Datu Jabidah Monseri.