SIBU: Kaban Kunsil Nengeri (ADUN) Tamin Datuk Joseph Mauh Ikeh ngarapka kimpin ngemunaska chit ulih dikemeranka belama tang ukai semina diatur maya tu aja.
Ku iya, chit tau bendar ngeruga pengerai mensia mayuh kelebih agi enti ba kandang pendiau ti enda beresi.
Nya alai, mensia mayuh aruh begempung enggau pangan diri ba pekara ngintu pemeresi ngambika chit ulih dipunaska.
“Chit rindu betansang ba endur ti enda beresi nyengkaum kedai makai ba pasar.
“Tang bisi ga nyadi ba kedai ti beresi chit bisi dia laban datai ari kedai ti enda beresi ke enda jauh ari nya,” ku iya.
Iya mantaika jaku nya maya bejadika Program Beripai beserimbai enggau Kimpin Munaska Chit ke diatur Opis Kunsil Menua Pesisir Sibu (SRDC), empai lama tu tadi.
Bela bisi datai maya tu iya nya Chairman SRDC Kunsilor James Laju Ambok enggau Chairman Komiti Pengatur Program Hennry Ibat.
Ku Mauh madah, mensia mayuh mesti ngemeratka pemeresi kandang pendiau diri empu nangika penyakit tau berampit.
Pendiau ti beresi ku iya nejuka pengidup ti meruan.
“Seririh enggau tuju kitai deka nyadi rayat mansang, bepenemu enggau bepengelandik, pemeresi mega anang enda dikemeratka ngambika pengidup semampai gerai,” ku iya madahka baru.
Mauh mega madah, igi penyakit ke bepun ari kemi chit pedis deka dikelai, nya alai, pemakai enggau ai irup mesti beresi magang sebedau diempa.