KUCHING: Lebih 20 iku udah ngerejister diri nyadi kaban baru Parti Rayat Sarawak (PRS) nyerumba sebengkah program ke diatur ba Rumah William Ngadan, Tudan, Miri kena malam Hari Dua tu tadi.
Sama bisi datai ngulu program nya Kunsilor Renggan Belatong, Sapit Chairman PRS Pampang Senadin, Egi Bangan King, sekretari pampang enggau kaban komiti ke bukai.
Ku Renggan, program tu diatur ninting minggu ngerejister kaban baru masuk parti.
“Taja pan kami sebengkah parti bepelasarka parti menua pesisir tang sitak Senadin majak mayuh diwan bansa Dayak ke datai ari menua pesisir, nya alai kami ngatur program ke bakatu.
“Naka kediatu, program tu mujur diatur lalu kami nerima sukung ari mensia mayuh lalu ngerejister diri nyadi kaban parti.
“Baka ke udah ditemu, kami sigi semampai mantu sida kelebih agi bansa Dayak ke nguji ngangkatka tikas pengidup diri ba kandang mengeri lalu kami bebendar mantu sida,” ku Renggan madah nengah penerang media dikirum ngagai The Borneo Post.
Ambika chunto, sekumbang ke ngatur program ke bansa tu, bisi 200 kes iya nya ruang bilik nadai ngembuan dokumen ke sah baka tingki enggau surat tikah.
“Kami mega mantu kaban kami baka ngerejister sida ba e-kasih, OKU, ngerejister masuk gerempung indai tunggal enggau utai bukai,” ku iya.
Ba pengerami nya, Ngadan ke mega seiku pinchin polis sereta ketuai Rukun Tetangga Tudan lebuh ditanya bekaul enggau penumbuh PBDS Baru madah taja pan menua Malaysia ngembuan adat demokrasi tang komuniti Dayak nya empu patut enda milih parti ke nguji mechahka raban bansa Dayak.
“Nya alai, kitai patut enda begilik nyukung PRS laban semina nya aja parti ke ulih ngemansangka bansa Dayak kelebih agi ba menua pesisir,” ku iya.