SIBU: Kepala Polis Sibu ACP shafie Ismail ngesahka kes nguna mata duit pelesu bedau lama ke udah, nadai kaul enggau sindikit.
Shafie madah, iya pechaya nembiak lelaki ke ditan laban begunaka duit pelesu bedau lama ke udah diterima iya ari endur bukai.
“Tu semina kes mit. Aku mega ngasaika kes tu nyadi ba endur bukai.”
“Taja pia, kitai enda nemu bakani chara duit pelesu datai ngagai menua tu lalu pansik benung dipejalai,” ku iya madah ngagai pemberita.
Apin lama ke udah, polis nangkap seiku nembiak lelaki beumur 14 taun lalu ngerampas enam kepin duit pelesu RM100.
Dulu agi ari nya, saspek dipadahka ngirup dulu ba sebuah kedai kopi.
Lebuh deka mayar, iya ngena duit pelesu nya, pengawa iya nya udah ditemu orang ke nyaga kaunter sebedau ngeriput ngagai piak polis.
Berindik ari nya, Shafie ngelalau raban orang dagang ngambika bejejaga lalu meresa dulu bansa duit ke dijual ngagai sida.
“Tukuka tetiap duit keretas ke diterima sigi tulin sereta ulih dibida nengah kualiti keretas ke diguna,” ku iya.
Kelimpah ari nya Chairman Gerempung Hotel Zon Tengah Sarawak Johnny Wong Sie Lee madah, naka kediatu iya nadai nerima sebarang kompelin bekaul enggau duit pelesu nya.
Taja pia, ba taun ke udah iya bisi dipadahka beberapa kes maya temuai sida nguji mayar bilik hotel ngena duit palsu.
“Nya alai, kaban gerempung patut ngemeratka atur pengelikun kelebih agi ba kaunter endur bebayar kelebih agi maya malam hari,” ku iya.
Wong mega ngelalau sida (kaban gerempung) ngambika nguna perengka ke dikena piak bank kena ngesahka duit nya pelesu tauka enda.