KUCHING:Presiden Parti Rayat Sarawak (PRS) Tan Sri Dr James Jemut Masing madah penerang Chairman DAP Nengeri Chong Chieng Jen ti madahka kes jenayah tauka penyalah jai ba menua tu majak niki ketegal kelikuh politik Barisan Nasional (BN) tang iya ke endar nya semina kena ngulihka puin politik.
Masing ke mega Menteri Kanan Sarawak madah, nadai seiku ketuai kelebih agi dalam BN entaruhka pengelantang pendiau rayat ketegal semina deka ngamatka jaku.
“Tang kitai enda meh ulih ngarapka diau enggau likun lebuh beratus-ratus iku orang jai ke berejister (RBC) dilepaska atas nama liberalisme.
“Orang ke landik dalam undang-undang pan enda ulih mutarka pekara nya, enti orang baka kami ke nyadi kaban politik enda nemu reti pengelikun lalu ngemeratka hak-hak beberapa iku raban ke beperangai jai tu,” ku iya ke mega Menteri Pemansang Tanah.
Iya madah, penerang ke dipansutka Kaban Parlimen (MP) Bandar Kuching nya enda amat, nadai dipansik dulu lalu enda patut dibantaika iya.
“Aku nyangka Chong landik agi ba pekara nya tang bepelasarka penerang iya nya semina deka ngulihka puin politik,” ku Masing ke baru pulai kemisi ari menua Australia.
Iya bejaku munyi nya lebuh dipinta nimbal penerang Chong ke pansut ba surat kabar The Borneo Post kena Hari Dua tu tadi ti madahka perintah sengaja ngemendarka pengawa salah nya nyadi ngambika ulih meri awak ngaga undang-undang baru nagang pengawa salah nya.
“Pelaba kami pengawa salah baka tu sengaja digaga nyadi ninting hari lalu polis pan enda ibuhka pemalat pengawa salah nya nyadi, ngambika bisi awak ungkup Zahid, ke nyadi Menteri Dalam Menua ngena kuasa iya enda ngasuh penyakal bemunyi,” ku Chong madah ba aum media Hari Satu tu tadi.
Menteri Muda Pemansang Nembiak, Abdul Karim Rahman Hamzah madah, nadai perintah ke ngembuan tanggungpengawa sengaja ngaga penyalah bansa nya.
“Malaysia ukai menua ke ngelakka pengawa salah ari terus nyadi. Jaku Chong nya enda amat sereta sengaja bejaika perintah. DAP semina deka melitka cherita nya aja lalu bejaika perintah enggau polis,” ku Abdul Karim, ti mega seiku luyar.
Abdul Karim ti mega nyadi kaban Kaunsil Besai Parti Pesaka Bumiputera Bersatu (PBB) sereta ADUN Asajaya, madah lebuh ‘Internal Security Act (ISA)’ enggau Ordinan Darurat dipadamka, nyauka 3,000 orang jil dilepas ari ukum sida iya.
“Lebuh beratika ISA enggau EO dipadamka, ketegal peminta ke suah endar ari parti penyakal, ke ngujungka 3,000 iku orang jil dilepaska, lalu diatu ditambah agi enggau penyuah orang ke betimbak sereta pengawa salah nyau nambah,” ku iya.
Jaku Chong ke ngaga tuduh bansa nya dipadahka tuai BN, jaku sengapa sereta sengaja bejaika perintah diatu.