TEPA KENANG: Tuai Rumah Santok (kanan) benung nyua tepa kenang ngagai Masir rambau atur pengerami nya semak ditu bedau lama ke udah.
Ngambika pengari rayat ulih mutarka penanggul lalu pemansang ulih dipejalai ungkup rayat: Masir
SRI AMAN: Sapit Menteri Dalam Menua, Masir Kujat ngelalau tuai raban bansa nyengkaum bala tuai rumah enggau ketuai genturung pendiau di nengeri tu ngeripot tetiap penanggul ke bisi nyadi ba rumah panjai enggau genturung pendiau sida ngagai pengari rayat ba kandang menua sida empu.
Ku iya, ripot tu beguna endar dianjung ngagai pengari rayat ba kandang menua sida ngambika pengawa ulih dipejalai enggau jampat sereta ke bukai ke pulaika pengelantang rayat.
“Anang ngelalaika penanggul ke ditapi rumah panjai enggau tumpuk pendiau kita laban tu deka nanggul nembiak redak enggau semua peranak rumah panjai tauka genturung pendiau nya,” ku iya.
Iya ke mega Kaban Parlimen (MP) Sri Aman mansutka jaku tu rambau bejaku ba Pengerami Pemesai Begulai Enggau Rayat ba Rumah Santok, Empaling Asal, Pantu semak Sri Aman bedau lama ke udah.
Ku iya nandu, pengawa tuai rumah enggau ketuai genturung pendiau beguna endar dikena mutarka penanggul tu, laban sida nyadi penyambung bala rayat ngagai perintah nyengkaum pengari rayat ba kandang menua sida.
Nya alai ku iya, randau enggau semua nembiak redak mega beguna endar alai berundingka tetiap penanggul ke ditapi peranak rumah panjai tauka genturung pendiau ulih ditemu kitai.
“Endang diaku genap rumah panjai enggau tumpuk pendiau bisi betapi enggau penanggul sereta ke bukai lalu nadai salah nyema penanggul nya dikunsi begulai enggau tuai rumah, ketuai genturung pendiau enggau pengari rayat menua nya.
“Seagi penanggul tu ulih diputar enggau jampat, perintah deka mantu ari bemacham sukut pekara ngambika rayat badu agi napi penanggul,” ku iya nyemetak.
Masir mega nerangka perintah Barisan Nasional (BN) nadai kala nejuka tanggungpengawa sida ngagai rayat tang semua rayat deka dibantu ari bemacham pekara.
“Tu nyata alai rayat empu udah meda pemansang ba kandang menua sida nyengkaum pemansang ba jalai alun, bekal ai beresi, bekal elekterik enggau pemansang ke bukai.
“Pemansang tu ungkup penyenang rayat ukai nya ngenusah rayat,” ku iya.
“Tanggungpengawa perintah BN iya nya mantu rayat lalu ukai nya ngenusahka rayat, nya alai tetiap penanggul ke ditapi rayat patut dikunsi begulai enggau pengari rayat,” tandu iya.