Penyulut akademik rebak nembiak kemaya hari tu nya penyikap dikena ngemansangka diri
KUCHING: Penyulut akademik ke diulih ari pengawa besekula senyata ke pemadu tajam sereta penyikap dikena bansa Iban rebak diatu ngemansangka diri, ku Sapit Dekan Fakulti Sains Sosial UNIMAS Prof Madya Dr Neilson Ilan Mersat.
“Kitai Iban nadai senyata lebih tajam ari penyulut ba pelajar, ukai dikena bepekit tang dikena ngemansangka diri.
“Enti pengawa besekula enda dikemeran sereta dikemeratka kitai bansa…pelaba aku, munyi ku jaku silup Iban ti besemaka ‘Baka Biru Diambika Sap, Baka Kerupuk Diambika Atap’,” ku iya.
Retinya semua pengawa ke pedis deka dikereja bala anak, uchu enti sida iya kurang pemandai sekula, tandu iya.
Iya mansutka jaku tu maya ngelaluka penemuai Menteri Muda Betanam Betupi Moden ke mega ADUN Bukit Begunan Datuk Mong Dagang enggau MP Sri Aman Masir Kujat ba pengerami Ketuai Begulai enggau Rayat di Rh Stephen Selepong Brangan Sri Aman Hari Enam tu tadi.
Seraya ti muji pengangkun kededua pengari rayat, Mong enggau Masir ti udah bebendar ngemesai pengawa besekula ngagai kitai bansa, Neilson madah nya mandangka pemesai reti pengawa besekula ba nembiak kitai diatu sereta ke jemah ila.
“Ba mayuh bengkah pengerami ti bekaul enggau pengawa besekula ba raban nembiak kitai bansa, seduai semampai ngenataika diri.
“Seduai udah meri peransang ngagai raban nembiak bansa kitai ke udah nyulut ba pelajar sereta tau bendar diambika chunto ngagai raban nembiak bukai,” ku Neilson.