KANOWIT: Peranak Rumah Awin Bajing, Sungai Mapai, Balingiau ditu ngarapka penusah jalai belubang ngalawa rumah panjai sida ulih jampat agi dikemanah.
Hari ke bejarit ujan ngujungka jalai sepemanjai urung lima kilometer nya majak jai.
“Bisi mega lubang ke balat dalam ba jalai nya lalu tau ngeruga pengelikun orang ke betengahka jalai nya lebih agi mutosikal.
“Nya alai aku ngarapka penusah ti nuntung kami ari empat buah rumah panjai di Sungai Mapai ditu ulih diputarka enggau lengkas,” ku iya madah ngagai pengarang berita, kemari.
Sebana sida tu kala dibai ngagai opis ti bekaul enggau pengari rayat bagi menua nya.
Tang nyentuk ke diatu penanggul lalu empai diputar.
Ku Awin, sida semenua nangika pekara ke enda disadang tau nyadi.
“Kitai enggaika penusah enda disangka nyadi baru deka enchelak,” ku iya nambahka baru.
Awin madah, ngelama tu jalai nya diintu kompeni kebun sabun bedandang besai.
Tang ku iya, taja pan baka nya, jalai nya mengkang enda likun ditengah sida ti ngena mutosikal laban lubang semina dialit ngena batu besai.