KUCHING: Seraban 348 iku udah nerima pemeri penyampau RM174,000 ari Opis Hal Ehwal Veteran (JHEV) nengah program pemeri nyerumba pengerami ke diatur ditu malam ensanus.
Bala penerima nya nyengkaum 158 iku veteran soldadu, 150 iku balu veteran, 25 iku veteran timpang pendiau,10 iku anak veteran ke patu balu enggau lima iku veteran ke diau ba rumah pengandai orang tuai.
Pemeri nya disuaka Panglima Satu Divisyen Mej Jen Datuk Mohd Zaki Mokhtar.
Sama bisi ngulu pengerami maya nya Direktor JHEV Sarawak Lt Kol Monday Juhid.
Lebuh bejaku,Monday madah, pemeri nya sebagi ari asil ke diulih maya Hari Bujang Berani, pengasih ari kompeni enggau perintah.
“Kelimpah ari pemeri tu, JHEV mega nyendiaka bantu bukai baka ngaga sereta ngemanahka rumah veteran. Dalam taun 2012, 16 buah rumah udah digaga tauka dikemanah lalu dalam kandang taun tu bisi 10 buah benung digaga sereta 10 buah agi benung dalam tasat ke penudi endar,” ku iya.
Berebak enggau nya, bisi 30 iku raban veteran Soldadu Malaysia (ATM) nerima Pingat Jasa Malaysia (PJM) dikena perintah ngingatka pengawa ke udah dikereja sida.
PJM iya nya ‘campaign medal’ ke ditumbuh kena muji pengering, pemerani enggau pengawa ke udah dikereja genap iku raban soldadu ari ketetiga pampang ATM mayu menua tu charut kelia. — Bernama