BEJADI: Sikie ngujakka pun sawit ba tanah kelai bejadika pengawa nasih tanah nya kemari.
Rayat dilalau enda ninga jaku petenah ti madahka perintah ngerampas tanah
BINTULU: Peranak ba Pelilih Menua Mit Sangan, Tatau dilalau enda ninga jaku sekeda raban ti madahka perintah deka ngerampas Tanah Pesaka Bansa Asal (NCR) ti dipenggi sida, ku Menteri Muda Ba Opis Kepala Menteri (Adat Bansa Asal Enggau Pekara Penan) Datuk John Sikie Tayai.
Ku iya, kenyau ari suba raban ti enda beradat tu endang semampai ngachuk runding bala ti beempu tanah NCR ambika enda masuk dalam projek ngemansangka tanah NCR begulai enggau perintah sereta kompeni ti dipilih.
“Penemu ti kepapas bakatu ukai semina nekul ke pengawa ngemansangka tanah NCR ba menua tu, tang mega ulih ngujungka tanah sida (pengempu NCR) dilak baka nya ngapa laban ti nadai chara engkeman dikena ngaduka tanah nya,” ku iya bejaku lebuh ti bejadika Pengawa Nasih Tanah Projek Pemansang Tanah NCR Sungai Tanyil/Majau/Sangan ti diatur ba kandang endur menua Tuai Rumah Jelaping, Jalai Sangan-Tatau ba ditu pagi kemari.
Iya ke mega ADUN Kakus madah, nengah projek ngemansangka Tanah NCR enggau chara kunsi (joint venture) ukai aja nguntungka orang ti beempu tanah, tang mega tanah sida nya ila deka diberi surat pala tanah ti ngujungka tanah nya ila endang deka diempu nyentuk ke anak uchu sida jemah.
Ku Sikie, orang ti beempu tanah pesaka nya mega enda aruh teparuk penemu ninga jaku asut sereta bantah raban tu ti sengaja nubai runding sereta enda ngasuh rayat ngemansangka tanah sida ngena chara kebun bedandang besai.
“Ke udah diperatika kitai, projek bekebun sawit bedandang besai ti diatur chara kunsi tu endang mujur nyungkakka penatai pemisi ruang bilik orang ti beempu tanah,” ku iya.
Nya alai ku iya, nadai kebuah orang ti beempu tanah enggai ngasuh tanah sida dikemansangka ari ti enda dikereja sereta nadai ngemansutka asil.
Projek pemansang tanah NCR ba kandang menua Sangan tu, urung 5, 727 hektar pemesai ti diempu 210 ruang bilik ari 14 buah rumah panjai deka dikemajuka Kompeni Ikrar Gemilang Sdn Bhd.
Entara ke bisi datai Pemesai Pelilih Menua Mit Tatau Nyura Keti, Chairman Protem Komiti Pemansang Pelilih Menua (ADC) Sungai Tanyil/Majau/Sangan Tuai Rumah Gerosen Jubin enggau Pengarah Urusan Ikrar Gemilang Sdn Bhd Ahmad Ibrahim.