KABAN BARU: Churchill (kanan) ngarika indu opis nyuaka kad nyadi kaban ngagai Brandah seraya dikemataka kaban parti ke bukai.
KOTA SAMARAHAN: Kaban Parti Progresif Demokratik Sarawak (SPDP) Pampang Muara Tuang ngarapka atur Komiti Pengawa Bepilih (SPR) senentang ngatur baru garis entara sitak Kunsil Nengeri deka bisi sitak ke baru ungkup sida ba menua nya.
Chairman pampang nya Kr Edward Brandah Madi madah, enti amat pekara nya nyadi sida deka sitak ke baru nya diungkupka ngagai SPDP.
Ku iya, SPDP Muara Tuang sigi patut diungkupka seiti penuduk ba menua nya laban diatu penuduk Asajaya enggau Muara Tuang ba baruh pegai Parti Pesaka Bumiputera Bersatu (PBB), iya nya parti ke pengabis besai ba Sarawak.
Tambah mega, ku Brandah pampang ke dipegai iya udah gawa bebendar ba Muara Tuang sekumbang beberapa taun ke udah.
Iya madah munyi nya ba jaku pengelalu aum besai ninting taun (AGM) ke diatur ba rumah iya di Lorong Panglima Kala, off Jalai UiTM-Entinggan ditu kena Hari Empat tu tadi.
Berebak enggau nya mega, SPDP Muara Tuang ngarapka pangku pengawa Pemancha ke udah lama puang diberi ngagai komuniti Iban.
“Kami arap bendar pangku pengawa Pemancha dipilih seiku ari kaban parti pampang kami, peranak asal menua tu empu sereta bagas begulai enggau pengari rayat ke bukai ba Kota Samarahan ditu,” ku iya.
Brandah mega madah, pampang parti deka ngenataika pinta ngagai indu opis parti bekaul enggau perambu nyiri seiku tauka dua kunsilor ngagai Opis Kunsil Samarahan (MDS) tauka nyiri seiku ari kaban pampang parti mangku pengawa dalam opis kompeni dikuasa perintah (GLC).
Ba pekara bukai, Brandah ngarapka kaban parti bebendar bejalaika pengawa ngerejister kaban baru sereta ngelakuka pusat servis parti ke bisi ditumbuhka ba Palan Dagang Medan Universiti.
“Kami mega merambu deka ngatur pengerami makai lemai ke disadang diatur ba bulan November taun tu kena ngerapatka kaul entara kaban parti enggau mensia mayuh,” ku iya.
Antara sekeda pekara ke bisi dikerandau iya nya bekaul enggau isu tanah NCR, politik enggau atur dagang ba raban bansa Iban.
Ba pengerami nya, pengawa nyuaka kad nyadi kaban bisi diatur ke disuaka Sapit Ketuai Pemadah Parti Churchill E Drem ngagai Brandah.
Bisi datai Sapit Chairman Pampang TR David Jiku Nader; Mandal Chairman Luho Entoi; Alon Tair emggau Reggie Timpon, Sapit tukang Wang pampang Faith Chau Kamis enggau pengari Biro Indu Emas Gijak.