Piak Indonesia bisi ati deka belajarka sistem ti dipejalaika kitai ditu madamka kampung angus
// Dikarang Rengenyan Labang //
NYAUP NGELEMPUNG: Wan Junaidi nyuaka bantu pelajar ngagai seiku ari 96 penerima bantu nya, kemari, seraya dikemataka bini iya Datin Seri Feona Junaidi (kanan).
KUCHING: Indonesia bisi ati deka nemu seraya belajarka chara sereta strategi Malaysia napi penusah kampung tauka tanah kerapa angus di menua tu.
Menteri Pengeraja Asal enggau Rampa Menua Datuk Seri Wan Junaidi Tuanku Jaafar madah, berindik ari pekara nya, dipelabaka enda lama agi seraban ari Indonesia deka nemuai ngagai opis menteri iya.
Iya madah, pengelandik, peneleba enggau kereban ti dikembuan Malaysia kena napi penanggul nya di menua tu narit ati piak Indonesia.
“Kitai bisi pengelandik enggau peneleba sereta ngembuan kereban ba pengawa ngurus lalu nyaga kampung enggau tanah kerapa lalu ari pengelui nya udah narit ati piak Indonesia belajar ari kitai.
“Enda lama agi seraban sida ari Indonesia deka datai ke Malaysia lalu nemuai ngagai opis menteri aku laban deka nemu baka ni chara tauka strategi kitai betapi enggau penusah kampung enggau tanah kerapa angus.
“Kitai melaba, piak pengatur pengereja pengawa ari Indonesia deka datai ke Malaysia pengudah penusah kampung di Sumatera enggau Kalimantan Indonesia angus bisi kurang lalu deka belajarka sistem ti dipejalaika ba semua tanah kerapa enggau kampung kitai ditu,” ku iya.
Iya mansutka pekara nya lebuh dirandau raban pengarang berita meri penerang silik bekaul enggau penemuai raban ari Indonesia ke Malaysia, ti deka nemu chara menua tu napi penusah nya.
Dulu ari nya Kaban Parlimen Santubong nya nyuaka Bantuan Kecemasan (Bantuan Pendidikan) Parlimen P.193 Santubong ngagai 92 iku penerima penyampau RM56,000, ti diatur ba opis iya ditu, kemari.
Nambahka nya Wan Junaidi madah, penemuai iya enggau Menteri Besai Datuk Seri Najib Tun Razak ke Indonesia bisi ngayanka pemutus ti manah bekaul enggau bantu ke ulih diberi Malaysia ngagai menua nya.
“Penemuai begulai enggau YAB Menteri Besai, aku ulih madah, penemuai nya mujur, kami mujur ngaga sekeda pemutus taja pan bisi enda bekaul enggau opis menteri aku.
“Berebak enggau tu kitai mega bisi madahka nama bantu ke ulih diberi Malaysia ngagai Indonesia bekaul enggau chara napi penusah kampung enggau tanah kerapa angus di Indonesia ti ngujungka sebun meraka garis antaramenua.
“Ke diatu bilun Bombardier ti dikena ngebom ai madamka kampung angus agi beopreasi din (Indonesai) dalam timpuh lima hari baka ke dipinta, dipelabaka pagila tauka lusa abis operasi,” ku iya.
Bejaku baru iya madah, menua tu meruan besedia bejalaika pengawa din, baka ke dipadah Opis Menteri Pengetan Menua ngatur pengawa bantu ari Kaunsil Pengelikun Nasional ari Bomba enggau Opis Rampa Menua.
Nitihku iya dipelabaka raban Bomba bisi dianjung mantu Indonesia nyema bisi peminta, lalu kitai tetap sedia, nya mega semaya YAB Menteri Besai enggai Presiden Indonesia Jokowi, ku iya.
Kelimpah ari nya Wan Junaidi minta rayat menua tu besedia sereta ngurangka pengawa betunuka chara tebuka, enda nunu uras sengapa tebuka seraya ngurangka impak El-Nino ti berengkah kenyau bulan September tu tadi nyentuk tengan taun 2016.
Berebak enggau tu iya ngarapka dalam Bajet ke deka dibantai Menteri Besai enda lama agi, opis menteri iya, Opis Menteri Menua Pesisir enggau Kandang Menua sereta Opis Menteri Sains, Teknologi enggau Inovasi deka diungkupka belanja khas dikena ngemayuhka telaga baruh tanah.