KUCHING: Opis Menteri Pelajar (KPM) ti netapka atur ngagai nembiak ti ngambi peresa Sijil Pelajaran Malaysia (SPM) teulihka penyulut 7A ungkup Semenanjung Malaysia enggau 5A Sabah enggau Sarawak ke deka minta kos nyadi pengajar, sebengkah chara dikena ngangkatka kualiti pengajar.
Menteri Pengintu Pengelantang, Orang Indu enggau Pemansang Ruang Bilik, Datuk Fatimah Abdullah madah, kualiti pengajar patut dikemerat berengkah ari maya deka ngambi sida masuk program nyadi pengajar.
“Nya sebengkah ari chara opis menteri deka ngangkatka kualiti pengajar. Enti kitai deka nuku ke seseiku pengajar nya bisi kualiti kitai patut berengkah ari maya ke ngambi sida nyereta program tauka kos nyadi pengajar.
“Opis menteri chukup ngemeratka pengajar ti bisi kualiti. Pengajar ti bekualiti nya ngembuan chukup pemandai enggau penemu laban pengajar ti ngerembaika penemu. Nambahka nya pengajar mega enda tau enda ngembuan ulah ti manah.
“Deka nyadi pengajar ti bekualiti tauka manah patut ngembuan chukup penemu, ulah ti manah, deka gawa tauka ngajar lebih dikena mantu nembiak ti amat begunaka bantu, sereta landik nengkebang (kreatif),” ku iya bejaku ngagai pengarang berita ditu, kemari.
Fatimah mansutka pekara nya lebuh dipinta meri penerang bekaul enggau atur KPM ti netapka nembiak ti ngambi SPM ke deka nyadi tauka ngambi program nyadi pengajar patut teulihka penyulut 7A (Semenanjung Malaysia enggau 5A (Sabah enggau Sarawak).
Dulu ari nya Fatimah nyuaka bantu Projek Mit Menua Pesisir (MRP) Kunsil Nengeri Dalat ungkup penerima bagi menua Kuching ti diatur ba opis iya di Bangunan Baitulmakmur ditu pagi kemari.
Kelimpah ari nya iya madah, penemu Opis Menteri Pelajar ti deka berundingka peminta pindah sekula endur ngajar ngagai pengajar ti idup jauh ari bini/laki enggau anak diterima enggau manah.
“Kitai nerima enggau manah penemu Opis Menteri nya ti deka bebendar berundingka peminta pengajar ti idup jauh ari bini/laki enggau anak ti minta dipindah sekula endur ngajar, ngambika enda jauh agi.
“Taja pia kitai nemu ngatur nya ukai pekara ti muntang laban pekara dikemeratka sekalika bisi puang tauka nadai ba sekula ti dipinta endur ngajar.
Kitai mega beratika opsyen enti bisi puang, ambika banding enti ke puang nya pengajar Matematik nyadi orang ke patut ngisi penuduk puang nya mesti pengajar Matematik,” ku iya.
Fatimah ti diberi tanggungpengawa ngemataka pekara pelajar di nengeri tu madah, bala pengajar mega enda tau enda meretika langkar atur ti udah disediaka, baka kemaya sesiku pengajar ulih pindah enggau ke bukai.
Ku iya, nyentuk ke bulan Jun 2013 penyampau semua pengajar ti ngajar ba sekula primari enggau sekondari serata Sarawak iya nya bisi 41,499 ti nyengkaum 13,955 iku pengajar ngajar di mengeri enggau 27,544 pengajar ngajar di menua pesisir.