SRI AMAN: Stanley Mamat udah ngangkatka nama Sekolah Menengah Kebangsaan (SMK) Saint Luke, Sri Aman pengudah ti mujur teulihka midul engkeraju dalam pekit Little Athletic International Ke-21 di Kuala Lumpur ke diatur kena 5 ngagai 7 Julai apin lama.
Ba lumba enggau main renggat antarabansa, Stanley ti peranak Peruan, Sri Aman ngarika kontinjen Malaysia dalam main ‘Merejam Lembing’.
Tiga gerempung lumba enggau main ti nyereta pekit Little Athletic International Ke-21 iya nya Majlis Sukan Sekolah Malaysia (MSSM), Singapora School Sports Council enggau West Australia Little Athletic Association.
Berindik ari penyulut iya, sebengkah pengerami mit diatur nyerumba Hari Perhimpunan sekula nya kemari, dikena ngerami pemujur Stanley.
Prinsipal Mering Jok Eng madah, penyulut Stanley nampung pemujur SMK Saint Luke teulihka midul renggat antarabansa, pengudah Rose Imbi ti nyulut nyadi atlit jalai kaki kelia.
Nitihku iya, penyulut Stanley teulihka midul renggat antarabansa nunjukka sekula nya ulih nempa atlit ti nyulut taja pan sekula nya bisi pengurang bekaul enggau nyendiaka kereban lumba enggau main.
Nambahka nya, penyulut nya ulih nyadika SMK Saint Luke sebaris nama enggau sekula beberita ti bisi pengelandik enggau kereban lumba enggau main ke chukup ngelama tu, ku iya.
“Aku ngarapka sekula tu ngemeran sereta ngemeratka kualiti enggau pengelandik nembiak nengah latih ti chukup ngambika pengelandik enda tebasau ngapa,” ku iya bejaku ngagai pengarang berita pengudah pengerami nya kemari.
Penyulut Stanley mega asil ari pengatur program latih, Gibson Gunting sereta dibantu jurulatih Demendraa John Pillai sereta Suhadi nengah mayuh bengkah latih ti udah ditusun tiga taun ti udah.
Pemujur program latih ngujungka atlit nya teulihka midul emas maya ngarika kontinjen Sarawak dalam pekit Majlis Sukan Sekolah Malaysia di Pahang sebedau tu.
Seiku agi nembiak SMK Saint Luke ti kala ngangkatka nama sekula iya nya Angelina Alfred Saleh dalam lumba Jalai Kaki nengah pekit Asean Scholl Meet taun 2005 enggau 2006.