GAYU GURU GERAI NYAMAI: Aaron (kiba) begulai enggau Sao sama nyepi kek nya.
Kitai empu rugi enti ngenggaika atur nyukat kelingi tanah NCR nengah inisiatif baru nya
SIBU: Kaban Parlimen Kanowit, Datuk Aaron Ago Dagang ngelalau mensia mayuh ba sitak parlimen iya anang kelalu mudah pechayaka petenah sekeda raban orang sentang pengawa nyukat kelingi tanah Adat Bansa Asal (NCR).
Ku iya, bisi sekeda orang ngachuk runding rayat madahka pengari rayat deka nyual tanah sida enti pengawa nyukat kelingi nya udah tembu dipejalaika.
“Rayat enda setuju enggau inisiatif nya laban sida pechayaka petenah orang nya sereta nadai betanya sentang pengamat pekara nya,” ku iya lebuh bejadika Pengerami Makai Lemai Keterubah diatur Gerempung Komiti Pemansang Enggau Pengelikun Genturung Pendiau ba Sungai Aya-Kejungoh-Ayam (PPK SAKA) kena lemai Hari Lima minggu nyin tadi.
Sama bisi ngulu pengerami nya, chairman PPK SAKA Sao Asing.
Ku Aaron, naka ke diatu ba pelilih mit menua nya semina mimit aja tanah Adat Bansa Asal NCR udah disukat nengah inisiatif nya, laban rayat enda setuju enggau pekara nya.
“Ketegal rayat ngenggaika inisiatif nya, Kanowit tinggal ari segi penyampau tanah ke disukat nengah iniisiatif nya enti dibandingka enggau pelilih mit menua bukai di nengeri tu.
“Tu pulaika pengerugi rayat di Kanowit laban perintah udah ngungkupka belanja ke besai dikena bejalaika iniisiatif nya,” ku iya.
Kelimpah ari nya, iya mega madahka mayuh geran ari perintah udah disadung ngagai penerima dalam taun tu.
Iya arapka mayuh agi rumah panjai, kelab enggau gerempung ukai dikuasa perintah (NGO) ba sitak Kanowit, minta geran nya taun baru.
Urung 200 iku Kaban PPK SAKA ngulu pengerami nya.
Malam nya mega sida diperindang penyanyi bansa Iban, Maryline Billy enggau Angela Lata Jua.