KUCHING: Sebengkah agi gerempung ex-polis deka dipunka di menua tu ke deka ngemeratka pengelantang pendiau raban polis ke kala gawa nyadi polis di dalam enggau menua luar.
Penumbuh gerempung baru nya diberi kelala enggau nama ‘Gerempung Alumni Polis Menua Sarawak (SAPA)’ tu diberi kelala ulih protem presiden gerempung nya, Datuk Abang Abdul Wahap Abang Julai maya aum media kemari.
Ku iya, pemutus numbuhka SAPA ukai betuju nganti pemisi gerempung ke udah bisi diatu tang gerempung baru tu silik agi, ari sukut nyadi kaban sereta nyengkaum semua ex-polis nyengkaum sida ke gawa nyadi ‘polis bantuan’.
“Kami udah besetuju deka numbuhka SAPA ukai kena nganti gerempung ke diatu tang kami deka gerempung baru ke deka dipun tu bejalaika pengawa sida iya enggau nyulut agi dibanding enggau gerempung ke bisi diatu.
“Kami nyadang nyangka bisi sida ke masuk gerempung tu nyadi kaban beserak lebuh SAPA tu ditumbuhka ila tang nya bepanggai ba seiku-seiku enti sida iya milih deka masuk SAPA tauka meruan dalam gerempung ke dipasuk sida kediatu,” ku iya.
Sama bisi nguluka aum media di Ringkat 4, Opis Kaunsil Bandaraya Kuching Utara (DBKU) kemari, protem sapit presiden Joni Jack, protem mandal Iskandar Kadir Merican enggau 18 iku raban komiti protem bukai.
Abdul Wahap nandu baru, ngerejister SAPA deka diserah ngagai Pengerejister Gerempung (ROS) enda lama agi, ngambika gerempung tu ulih ngaga pengawa sida iya, ke deka meri penguntung ngagai kaban gerempung.
“Kelimpah ari nyaga pengelantang pendiau kaban gerempung, SAPA merambu deka sama enggau ngereja program pemansang di menua ke betuju nyapai ngenudukka menua tu nyadi menua ke maju sereta ngembuan pemisi ke tinggi manggai taun 2020.
“Kelimpah ari nya, SAPA mega merambu deka bekaul enggau ejensi Perintah enggau peribit bukai dalam muka kompeni tauka ngatur kerejasama dua piak ke deka meri penguntung ngagai kededua piak.
“Baka chunto, ‘Security Guard Company’ ari kitai ngambi orang ari menua luar gawa nyadi jaga, manah iya diberi ngagai alumni kami,” ku Abang Abdul Wahap, ti mega nyadi Datuk Bandar DBKU.
Iya mega madah, SAPA enda bekaul enggau sebarang pengawa politik lalu deka mandangka sida iya deka nyadi nyulut agi sereta nyadi chunto ngagai gerempung bukai ke bisi diatu sereta ke deka ditumbuh jemah ila.