BEBELI BARANG KENA KRISMAS: Gaya mensia mayuh ke deka bebeli barang di Covent Garden, London.
KUCHING: Beserimbai enggau pengawa ngerami Hari Krismas ti semina tinggal dua hari aja agi, mensia mayuh ke nguan kandang mengeri tauka menua pesisir benung kiruh bebelika barang kena ngintu hari besai nya.
Nyauka tiap endur palan bebeli barang dedat laban mensia lalu baka nya mega enggau jalai alun, ari pagi ngagai malam, semampai penuh laban kerita.
Christina anak Apau, 29, ari Kapit madah taun tu, sida menyanak nyambut Hari Krismas di Kuching di rumah menyadi iya.
Maya dikerandau lebuh bebeli barang di sebuah pasaraya besai di mengeri tu, Christina madahka iya baru udah tembu bebelika baju dua iku anak iya.
Christina ke nyadi kerani di sebuah kompeni ngaga rumah di Kapit, ngarapka taun baru tu ila, mai mayuh agi pemujur ngagai sida sebilik.
“Beserimbai enggau Hari Krisms tu, aku ngarapka mayuh agi pemujur deka datai, lebih agi maya tu aku betubuh bisi. Diatu udah masuk tujuh bulan. Ku doktor madah, anak aku tu beserak,” ku iya, ke gaga endar ninga berita manah nya.
Teresa Wilson, 40, ari Kuching, madahka Hari Krismas, hari begempuru enggau diri sebilik, lalu jarang endar di mengari bisi ‘Rumah Terbuka’, ku iya.
Lebuh dikerandau, Teresa ke gawa di sebuah ejensi Perintah, baru udah tembu bebelika barang ias kena rumah maya Hari Krismas, madahka Hari Krismas hari ke endang dikearap mai semua diri menyadi, apai indai, ipar, anak menyadi begempuru sereta beserumpu makai.
“Kami sigi jarang bisi ‘Rumah Terbuka’ laban Hari Krismas tu spesil ke diri sebilik aja,” ku iya.
Ba seiku nembiak sekula, Trisha Jane, 15, bebansa Iban/Bidayuh madah, Hari Krismas, hari dikerinduka iya, laban maya nya, iya bepeluang nulung apai indai iya bekemaska rumah, ngias pun Krismas, sereta bepeluang meli baju baru.
“Aku udah meli sepasang baju gaun, kena ngintu Hari Krismas, sereta kena nurun besembiang Hari Krismas. Taun tu, pengerami nya disambut kami sebilik umbas iya, tang laban kami bisi ‘Rumah Tebuka’, ngarapka mayuh kaban belayan sereta bala pangan deka datai.
“Pelaba aku semina maya Krismas aja ulih betemu enggau kaban belayan laban enti hari bukai, semua orang gagau gawa,” ku iya.
Sha Davidson, umur urung 30 taun, bansa Iban ari Balingian udah lama diau di Cullen, Scotland sereta bisi dua iku anak mit madahka, iya lelengau amat lebuh hari besai, siti aja ke nadai di Scotland, ku Sha.
“Di Scotland, chara orang ditu nyambut Hari Krismas lain ari kitai. Laban adat sida ditu, Hari Krismas kena diri sebilik aja.
“Semina mentua, bala ipar enggau anak menyadi laki aku aja ke ngabang ngagai kami, lalu beserumpu makai. Udah nya, belelak aja di rumah meda orang main bol ba TV tauka bala nembiak bemain ‘game’,” ku Sha, ke ngenang rumah panjai sida di Balingian ninting taun Hari Krismas tetap rami laban, ukai semina beserumpu makai, tang ngabang ngagai kaban belayan bukai.
Caroline Basford, 52, ari Saratok sama udah lama diau di Aberdeen, Scotland, tang tiap taun maya Gawai Dayak aja ke bisi pulai ke Sarawak tauka ke menua (Saratok).
“Utai ke ngerinduka ati maya Hari Krismas, lebuh bebelika ‘present’ ke diri sebilik sereta berapi malam sebedau Hari Krismas. Kami ditu, beserumpu makai tengahari aja Hari Krismas. Maya nya bisi (turkey) sereta pemakai Krismas bukai, kelimpah ari Wine enggau Champagne,” ku Caroline ke nyendiaka semua pemakai nya kediri iya aja.