Pengawa bejalai bebala mayuh nya diatur begulai kena ngerami Hari Krismas taun tu
KAPIT: Sekretari Politik Kepala Menteri Sarawak, Wilson Nyabong udah bejadika Pengerami Hari Krismas 2013, ke diatur Gerempung Gerija Sarawak ngarika Sapit Menteri Pemansang Menua Pesisir enggau Pelilih Menua kena lemai Hari Lima minggu tu tadi.
Wilson Nyabong disempulang bala ketuai ari mayuh bengkah gerija nguluka lebih 2,000 iku raban keristin bejalai bebala mayuh ngelingi pasar Kapit ke tembu ba Dewan Suarah Kapit.
Program nya berengkah pukul 6:30 nyentuk ke pukul 11.00 malam dikerami enggau mayuh bengkah main baka caroling ari Pastor Simon Kong Chung Chee, koir ba pemun enggau pengujung program nya ari gerija Hock Ing Methodist, jaku pengelalu Father David Ho ari Gerija Katolik, sembiang pemuka program betuaika Pastor Yu Ming Puo, besembiang bebala mayuh diuluka Gerija Community Baptist, mantaika main betanda ari Gerija Ong, bacha injil ari Pastor Simon Kong, bacha Gospel ari Father David Ho, pesan Hari Krismas ari Pastor Bujang Enggik, nungkun dian penyerakup ari semua bala ketuai gerija sereta sembiang puji.
Rambai jaku program nya taun tu iya nya ‘Gift of Love’.
Lebuh bejaku ba pengerami lemai nya, Wilson muji semua raban keristin ari gerempung gerija laban ke berakup ngulu sereta ngerami pengerami nya.
“Tu mih tanggam ke rat raban keristin ari baruh Tuhan Jesus. Taja pan kita datai ari gerija ke bebida, tang tuju kitai orang keristin endang sebaka magang, pechayaka Iya, besembiang sereta muji Tuhan,” ku iya.
“Aku berasai lantang endar ati meda pemayuh orang datai ngulu program tu, lebih agi bala nembiak ti malutka diri enggau gerija. Bala nembiak patut malut diri ba pengawa ke baka tu ngambika sida ulih nyaup ngerembaika penyanyau enggau penyerakup ari Tuhan Jesus ngagai mensia mayuh. Enti bala nembiak regas ba pengawa di gerija, nya ulih nyaup ngenegapka disiplin enggau ulah sida ngambi ngenyauhka diri ari penusah rama,” ku iya.
Berebak enggau nya, ba jaku pengelalu Father David Ho madahka pengereami Hari Krismas tu patut ngaga sereta ngelantangka ati semua laban raban Keristin udah diberi Tuhan Jesus penyanyau.
Raban Keristin mega enda patut ngintu Hari Krismas tu ari segi mandangka pengaya, pemakai enggau ai irup aja tang ngeringka semengat sida nengah chara besembiang.
Kitai ke nyadi orang Kristin, patut besembiang ngagai Tuhan, muji Jesus ngambika teulihka lalau enggau pengering ba semengat,” ku iya.