ENGGI NUAN: Shahasir (dua kiba) nyuaka setipikit ngagai seiku nembiak seraya dikemata Ali Yusup (kiba) enggau Zaidel Ismail, chairman komiti Kepala Pengajar Sibuti (tiga kiba).
MIRI: Sarawak Shell Berhad, berindik ari pemujur udah lama ngatur Klinik Shell UPSR sereta dekaka ubah enggau bida ba nembiak menua pesisir, sekali agi udah ngatur klinik ke sebaka kena Hari Enam nyin tadi di Bandaraya Miri.
Seraban 300 iku nembiak ari 20 buah sekula primari di Miri enggau Sibuti udah bulih penguntung ari klinik sehari berunggu nya.
Bala nembiak ti ngulu klinik nya ari sekula SJK Chung Hua Sibuti, SK Kampung Angus, SJK Chung Hua Lumut, SK Tawakal Satap, SK Kampung Masjid, SK Kampung Subak, SK Kampung Bungai, SK Kuala Sibuti, SK Beliau Ahad, SK Ulu Satap, SK Beliau Isa, SK Rumah Essau, SK Bekenu, SK Selanyau, SK Keleru Tengah, SK Kepa Sawit No. 2, SK Kampung Tengah, SK Riam Bt. 2, SK Kampung Bulau enggau SK Lutong.
Klinik Shell UPSR 2015 nya diatur beserimbai enggau taun ke-11 ‘Shell employees outreach programme’ ti berambaika leka jaku ‘We Care, We Share’ ti dipunka dalam taun 2005. Program nya nyendiaka bala nembiak enggau garis lalau sereta teknik ke betul ngambika sida nemu nyaut tanya peresa. Ungkup taun 2015 tu, sabjek ti bisi dibungkur iya nya Bahasa Malaysia, Matematik, Sains enggau English. Kelimpah ari nya, bisi ngaga ‘Shell Video Presentation’.
Shahasir Mohd Nasir, Sarawak Shell Maintenance Menijar udah bejadika klinik nya ngarika Sarawak Asset General Menijar.
Ku iya, “kenyau dipunka dalam taun 2005, program udah diatur ninting taun. Tu taun ke sebelas sida udah nyaup nembiak Primari Enam nyapai penyulut ba peresa UPSR ”.
Dalam timpuh sebelas taun ke sebedau tu,Shell udah ngatur kem motivasyen ti sebaka enggau woksyop bekaul enggau teknik nyaup tannya ba peresa UPSR ungkup nembiak Primari Enam ari menua pesisir Miri.
Ku Ali Yusup, Sarawak Shell ngubah kuing nyadi koordinator, ti mega nyadi ketuai projek, “Peluang tu ulih nyendiaka sukung moral ngagai bala nembiak ti deka ngambi peresa UPSR dalam bulan semilan tu ila,”.
Beasal ari Kampung Selanyau dalam pelilih mit Bekenu di Miri, Ali udah ngasaika pemerinsa maya ke agi biak suba lalu beabis ati deka gubah nya.
“Ukai baka nembiak bukai ti serebak ke diau di nengeri, bala nembiak tu diau jauh di menua pesisir sereta nadai teknologi moden enggau infrastruktur,” ku Ali.
“We Care, We Share’ ti dipenyadi dalam taun 1998 mega udah nyadika pelasar ‘smart-partnership program’ ti ngembuan juluk deka mantu komuniti ngambika ulih bediri ngatika diri negah bantu ari staf sereta ruang bilik ari Shell.
Ngelama tu, pekereja enggau kontriktor Shell mega udah mantu ngaga rumah ungkup orang ti enda benasit manah, bejalaika kimpin meri darah, nyidi komuniti ti diau di ulu menua pesisir sereta meri bantu gari, ubat tauka perengka rumah sereta nyaup komuniti meresi kandang pendiau sida.