Dikarang Rengenyan Labang//
MANAH: Fatimah ngayanka baju sereta powder anak mit ti deka disadung ngagai indai biak ba ward beranak HUS, lalu diperatika (ari kiba) Dr. Chin, Noriah sereta Rosey (empat ari kanan) enggau ke bukai. Bisi 50 pek disadung ngagai ward beranak HUS.
Nembiak sekula ti udah nyadi indai patut diberi peluang nampung pelajar
KUCHING: Nembiak sekula ti agi biak tang udah nyadi indai patut diberi peluang nampung pelajar pengudah beranak.
Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah madahka indai biak nya bisi hak nampung sekula baka nembiak bukai ke sama umur.
Berindik ari pekara nya iya ngarapka piak sekula, pengajar, apai indai sereta orang mayuh meri peluang kedua ngagai indai biak nampung pelajar.
“Kitai ti nyadi apai indai, mensia mayuh sereta indai biak nya empu patut ngubah runding ari ngembuan penemu, indu ti ngandung maya besekula enda ulih nampung pelajar sereta puntul jalai pengidup.
“Tang ke bendar indai biak tu patut diberi peluang sereta diterima nampung sekula baru pengudah beranak. Sida (indai biak) bisi hak besekula sereta ngembuan pelajar.
“Piak sekula lebih agi kepala pengajar enda tau enda nerima indai biak tu nampung pelajar sekalika ba sekula ke sama tauka ba sekula bukai.
“Nya kebuah dalam komiti ‘One Stop Teenage Pregnancy Committee’ (OSTPC) bisi nyengkaum Opis Pelajar ngambika ulih mantu indu ke agi besekula tang nyau udah nyadi indai biak,” ku iya.
Fatimah mansutka pekara nya dalam aum pengarang berita pengudah mendingka licha pasal ‘One Stop Teenage Pregnancy’ ti diatur unit pengerai mensia mayuh ba sebengkah bilik aum ba Sepital Besai Sarawak (HUS) ditu, pagi kemari.
Ngenang pasal OSTPC iya mada, entara ke nyadi komiti OSTPC ti ditumbuhka bulan Oktober 2014 renggat nengeri iya nya Opis Pengerai, Opis Pengintu Pengelantang Raban Bansa (JKM), Opis Pelajar, Opis Pengerijista Bansa, Opis Pemansang Islam, LPPKN sereta Gerempung Ukai Dikuasa Perintah (NGO).
Tuju komiti ditumbuhka iya nya ngambika berandauka kes sereta mutarka penanggul enggau holistik ti nyangkaum ba pekara fizikal, mental, ekonomi, pelajar enggau kebukai bekaul enggau indu biak umur sereta patut besekula tang udah beranak (ti beumur entara 10 ngagai 19 taun).
“Ketegal Sarawak nengeri pemadu tinggi dibandingka enggau nengeri bukai ari segi peratus penyampau indu biak ke ngandung, kami ngasaika komiti OSTPC endang patut ditumbuhka.
“Penyampau indu biak ti ngandung di nengeri tu iya nya taun 2011 bisi 9.5 peratus(%), 2012 (9.7%), 2013 (9.9%) lalau ba taun 2014 bisi nurun iya nya 8.9 %. Kitai ngarapka peratus taun tu mega bisi nurun ari taun ke udah.
“Nitihku penerang doktor (ba HUS) seharitu (kemari) bisi 14 kes indu biak beranak, penyampau nya udah biasa, dalam sehari bisi empat kes beranak ari raban indu biak,” ku iya.
Nambahka nya iya madahak komiti OSTPC beperambu deka ngembuan palan nyaga enggau ngibun indu biak beranak jemah ila, ke alai diaku OSTPC deka ngerembaika komiti nya ngagai semua bagi menua di nengeri tu.
“Diatu bisi dua bagi menua ti udah mujur numbuhka OSTPC iya nya Bagi menua Kuching enggau Samarahan. Jemah ila kami beperambu deka numbuhka palan nyaga enggau ngibun indu biak ngandung, ke alai pengudah tembu Hari Raya Puasa ila kami sebuat deka nemuai ke Johor enggau Melaka berati, belajar sereta ngena tauka nunda chara menua nya bejalaika palan,” ku iya.
Sama bisi datai ngagai program licha nya kemari kemari Menteri Muda Pemansang Ruang Bilik enggau Pelajar Tumu Anak Mit Rosey Yunus, Direktor HUS Dr. Chin Zin Hing, Pakar Perubatan Kesihatan Awam Dr. Radziah Mohamad, Direktor Opis Orang Indu enggau Ruang Bilik Nengeri Sarawak Noriah Ahmad enggau kebukai.