Dikarang Jacqueline David//
UNGKUP PENGELIKUN KAMPUS: Acryl nabi Mohd Kadim laban UNIMAS udah mujur bisi Polis Bantuan seraya dikemata Mohd Fadzil (kanan).
KOTA SAMARAHAN: Urung 54 buah ejensi di Sarawak udah bisi ‘Polis Bantuan’ kediri empu, lalu penyampau nya nyadi sebagi ari 204 buah ejensi ke udah bisi Polis Bantuan di serata menua Malaysia. Berindik ari nya, ejensi perintah sereta peribit dilalau muka mayuh agi polis bantuan kediri empu.
Direktor Opis Pengawa Nagang Pengawa Jai sereta Pegelikun Komuniti Dato Acryl Sani Abdullah Sani madah, beratika penyampau polis bantuan diserata menua tu ulih nyendiaka urung 26,000 iku polis bantuan.
“Beratika semua pemayuh polis bantuan ti udah dikemendarka urung 26,000 iku polis bantuan, kami ngarapka unit polis bantuan tu meri penambah impek nyaga pengelikun ba komuniti kitai,” ku Acryl.
Iya madah munyi tu lebuh bejadika atur pengawa Nyuaka Setipikit Pemendar Polis Bantuan Universiti Malaysia Sarawak (UNIMAS), BLD enggau Coromax Sdn Bhd di Bilik Galeri, Rumah Universiti di UNIMAS ditu, kemari.
Iya nandu baru,polis bantuan tu deka ngemuntangka agi pengawa polis ngetanka pengelikun di semua endur.
“Polis bantuan tu ngembuan kuasa ke sebaka enggau polis bukai.
“Tetiap iku polis bantuan enda tau enda bejalaika pemun pengawa latih dalam kandang dua bulan setengah ba palan latih polis lalu udah nya bejalaika latih sereta servis sebarang maya dikena sida nambahka pengelandik enggau penemu ngambika sebaka enggau polis di institut polis menua tu.
“Lalu ngarapka nya deka nyadi siti fenomena ke besai di menua tu. Aku ngasaika tu siti atur ti unik di menua tu ke alai kitai ngena kerejasama tauka ‘smart partnership’ ti meri penguntung baik nya ngagai Perintah ti diarika PDRM enggau peribit,” ku iya.
Acryl meri besai terima kasih ngagai UNIMAS laban udah nyadi universiti ke-10 bisi Polis Bantuan.
“Tu mandangka pengingin perintah matak pengerindu mayuh renggat ejensi perintah tauka peribit ti mangku tanggungpengawa nyaga pengelikun ti nerima timbal ke manah sereta impak ke positif ukai semina ngagai kompeni nya empu tang mega ngagai komuniti ba endur nya kelebih agi ejensi sereta kompeni ke jauh ari bungkur polis tauka di menua pesisir, sereta ba endur ke mayuh mensia serta kurang polis,” ku iya.
Acryl madah, tu mandangka pengawa nagang pengawa jai ukai semina diserah ngagai PDRM aja tang penemu tu dipandangka enggau peminta deka numbuhka Polis bantuan ari mayuh renggat baik nya perintah tauka peribit ke udah manggai urung 24 buah ejensi di serata menua.
“Tu siti singkang sereta pemendar PDRM nyaut pengingin perintah ti deka meda mayuh macham renggat sama besaup nagang pengawa jai begulai enggau PDRM, ngambika rayat diau dalam pengelikun,” ku iya.
Ku iya, kerejasama tu deka muka jalai begulai enggau PDRM tauka peribit dalam mayuh macham sukut ke besai sereta meri impek ngagai kededua piak.
Sebedau nya, Mandal Canselor UNIMAS Prof Dato Dr Mohd Kadim Suadi madah, di UNIMAS sebedau bisi polis bantuan, sida iya udah bisi Kor Suksis (Kor Sukarelawan Simpanan tauka Polis Siswa Siwi) ti ditumbuhka taun siti nyin tadi.
Kor-Suksis ngambi nembiak universiti, ke alai nembiak nya dilatih nyadi pemesai polis dalam kandang tiga taun nengah siti modul pengawa latih ti ditusun, ke alai sida iya dilatih maya ujung minggu kelimpah ari pelajar akademik sida iya.
Nangkan nya, sida iya diberi mangku pengawa nyadi inspektor volenter.
“Polis bantuan tu siti agi perambu dikena ngangkatka tikas pemesai pengelikun kami di kampus. Enti diperatika, kampus UNIMAS tu besai endar sereta nembiak ke belajar ditu manggai 17,000 iku lalu bala staf mega bisi urung 2,400 iku.
“UNIMAS begunaka sebengkah agi bagi ti ngemeratka pengelikun laban kami ngembuan komuniti ke besai ti begunaka pemesai pengelikun kami dilatih baka polis.
“Tu ke nyadi penambah ti dikedeka kami, dalam kami ngemujurka peneka kami ngaga kampus tu kampus ti likun,lantang endur belajar sereta diau,” ku Mohd Kadim.
Naka kediatu ku iya, di UNIMAS tikas pengelikun sida agi ulih dijaga taja pan kekadang bisi kes ke mit nyadi.
Bekaul enggau pengawa masang CCTV, Sapit Mandal Canselor (Pekara bekul enggau Nembiak sereta Alumni) Prof Mohd Fadzil Abdul Rahman madah, CCTV dikena di kampus nya tebal agi dikena nyaga sereta ngemataka pengelikun dalam kampus.
“Diatu kami deka nyendiaka CCTV nitihka zon ba sekeda endur didalam kampus ti enda tau dikemataka enggau manah. Sekeda CCTV nya deka dipasang ba palan ti berisiko besai nyengkaum ba pintu penama enggau pemansut kampus tu,” ku iya.
Sama bisi ngulu atur pengawa nya kemari, Sapit Ketuai Direktor Koordinasi Sumber Sokongan JPJKK Bukit Aman SAC Saiful Azly Kamaruddin, Direktor Eksekutif BLD Plantation Wan Abdillah Wan Hamid enggau Menijer Besai Coramax Sdn Bhd Jonathan Naming.