KUCHING: Sepenyampau 917 buah koperasi udah direjista nyentuk ujung bulan Disember 2014 di nengeri tu, pia ku Menteri Muda ba Opis Kepala Menteri (Pemansang Orang Dagang) Datuk Mohd Naroden Majais.
Iya ti mega Menteri Muda Pengatur Pemansang Pengeraja Asal madah, enggau penyampau kaban 334,649 iku bisi RM158.13 juta modal syer ulih digumpul, aset sepenyampau RM543.68 juta enggau untung ti diulih setaun bisi RM160.71 juta.
“Enggau penyampau ke dipadahka aku nya tadi, aku ngasaika koperasi menua kitai tu ulih mai penguntung ngagai Pemansut Kasar Dalam Menua (KDNK) baka ti udah ditagit, iya nya ngulihka RM50 bilion lebuh manggai ba taun 2020,” ku iya.
Naroden mansutka jaku tu ba ‘Majlis Penutupan Bicara Profesional Harta Intelek (IP): Peluang Dan Cabaran’ di Hotel Imprial ditu, kemari.
Lebuh ngenang pasal program nya, iya madahka rambai jaku ti dipilih ungkup program nya amat senipak enggau polisi perintah nengah Dasar Koperasi Negara (DKN) 2011-2020 ngerembaika agi pemansang sereta ulih besemekih dalam bidang dagang sekalika markit dalam tauka luar menua.
“Aku arap bendar rambai jaku ‘Bicara Profesional’ ke sekali tu setipak enggau pengawa perintah ti mai transformasyen ngagai koperasi nyadi seiti entiti sosio-ekonomi ti lebih efisyen lalu ngetanka prinsip, philosopi enggau pemaik koperasi,” ku iya.
Naroden madah,tetiap koperasi patut meretika reta intelek ti dikembuan koperasi laban nya asil kreativiti ti datai ari daya intelektual tauka runding sesiku orang.
Ari pengawa ti ulih meretika konsep reta intelek ku iya, piak koperasi ti bisi produk tauka servis ulih ngelindung asil nya ari dichuri tauka dichelak.
“Pengempu reta intelek diberi hak eksklusif sereta reta intelek ti diasilka nya deka dijaga ari baruh undang-undang reta intelek,” ku iya seraya madahka reta intelek ti udah lama dikelala baka paten, chap dagang, gaya industri enggau hak cipta.
Dulu ari nya, Bicara Profesional ti diatur Maktab Koperasi Malaysia udah bejuraika dua keretas kereja iya nya ‘Apakah Harta Intelek?’ ti dipejuraika Direktor Perbadanan Harta Intelek Malaysia (MyIPO) Sarawak, Vincent Lejau enggau ‘Kisah kejayaan jenama MUSC’ dipejuraika Direktor MUSC Food Industries Sdn Bhd, Vincent Chong.
Bisi ngulu pengerami nya Direktor Maktab Koperasi Malaysia Pampang Sarawak, Siti Maimunah Jerni. — Bernama