KUCHING: Presiden Parti Demokratik Progresif Sarawak (SPDP), Tan Sri William Mawan Ikom enda ngenggaika atur parti ngambi baru sekeda ari raban ke gelar diri “Group of Five (G5)”.
Bejaku ngagai pemberita ensana, iya madah begempung tauka bebaik baru entara kededua piak ulih nyadi tang tegap penemu madahka enda semua ari raban sida nya (G5) deka diterima baru dalam parti.
Atur tu digaga ku Mawan kena ngenegapka agi parti kena napi pengawa bepilih nengeri taja pan teulihka pemujur ti nyulut rambau Pengawa Bepilih Besai Ke-13 (PRU13), empai lama ke udah.
“Pekara ke beguna bendar diatu…berengkah ari hari keterubah sepengudah PRU13 kami deka ngenegapka diri kena napi pengawa bepilih nengeri dalam kandang dua taun tu.
“Tu nyengkaum atur bebaik baru. Tang enda 100 persin,” ku iya madah ngagai pemberita pengudah nerima penemuai basa Sarawak Auto Enthusiats Society (SAS) ba opis iya, empai lama tu tadi.
G5 nyengkaum ari lima ex-kaban SPDP ke ditingkilka ari parti kena November 2011 iya nya, Datuk Peter Nansian Ngusie (Tasik Biru), Rosey Yunus (Bekenu), Datuk Sylvester Entri (Marudi), Paulus Palu Gumbang (Batu Danau) enggau ex-Kaban Parlimen Mas Gading Datuk Dr Tiki Lafe.
Ar penyampau 71 buah penuduk DUN ke dipetandingk Barisan Nasional (BN), lapan ari nya diungkupka ngagai SPDP nyengkaum Pakan, Krian, Meluan enggau Ba’Kelalan kelimpah empat ke dipangku G5.