SRI AMAN: Bala tuai raban bansa kelebih agi raban tuai rumah di pelilih menua tu dilalau ngambika nyeridi bala anak buah di baruh pegai sida ngambika terus meri sukung ngagai perintah, ku Menteri Muda Pemansang Menua Pesisir enggau Pengawa Berumah Sarawak, Datuk Francis Harden Hollis.
Nundaku iya, bala tuai raban bansa kelebih agi bala tuai rumah ngembuan tanggungpengawa ke beguna nyeridi bala anak buah sida ngambika nyukung perintah.
“Kita ke mekuh pengawa nyadi tuai rumah nya orang ke nyempil bala anak buah lalu kita nya meh nyadi pengari di kandang menua ke dipegai kita.
“Keba nya, kita enda tau nubai runding rayat ngujungka sida benchi ngagai perintah tang kita nya orang ke bisi kuasa di rumah panjai nyeridi rayat ngambika terus nyukung perintah,” ku iya.
Iya ke mega Kaban Kunsil Nengeri (ADUN) Simanggang bejaku munyi nya lebuh ke nemuai ngagai Rumah Grain, San Munggur Undop semak Sri Aman, bedau lama ke udah .
Ku iya, perintah Barisan Nasional (BN) udah lama napak diri di menua tu lalu mayuh pemansang ke dipeda kitai nya semua datai ari perintah BN.
“Berindik ari nya, nadai kebuah rayat nulak pemansang perintah BN laban perintah BN ke diketuaika Menteri Besai Datuk Seri Najib Tun Razak di tikas perintah besai enggau Pehin Sri Abdul Taib Mahmud di tikas nengeri udah mujur ngemansangka menua tu.
“Keba nya, sida ke udah limpang maya Pengawa Bepilih Besai (PRU) Ke-13 tu tadi aruh begempung baru enggau BN laban udah mayuh dipeda perintah BN perintah ke manah ke semampai lekat di ati rayat,” ku terang iya.
Tandu Harden, semua pemansang ke dipeda baka pemansang jalai alun, bekal ai beresi enggau ke bukai nya semua datai ari perintah BN tang ukai ari piak penyakal.
Ukai semina nya aja, mayuh pemansang tanah ke udah dipenyadi di kandang menua Sri Aman nyengkaum Sekim Sawit, Getah enggau ti bukai.
“Nengah projek pemansang tanah tu, kitai arap nya deka meri penguntung ngagai peranak di kandang menua pesisir dikena nyungkak penatai pemisi peranak menua nya empu,” ku iya.
Bisi datai mega, Pemuda Parti Sa’ati Rayat Sarawak (SUPP) N.27 Simanggang, Patrick Micheal Dian, Kunsilor Sawing Sumar sereta bala tuai raban bansa ke bukai.