KUCHING: Parti Keadilan Rakyat (PKR) deka ngemutuska tumu bagi sitak enggau nama chalun ti ngarika parti ba Pengawa Bepilih Nengeri ti deka datai sebedau ujung taun tu.
Pekara nya dipadahka Chairman PKR Nengeri Sarawak, Baru Bian ngagai pemberita ba sebengkah aum pengarang berita ditu kemari.
“Kena napi pengawa bepilih nengeri ke deka datai, taja pan dipelabaka deka diatur dua tauka tiga taun ke deka datai, tang ba bulan November taun tu kami ngemutuska tumu sapa bagi nama chalun enggau sitak endur bediri minta pilih nya,” ku Baru ti nyadi Kaban Kunsil Nengeri Ba’Kelalan.
Berebak enggau nya iya madahka diri temegah ati laban ba pemutus PRU 13 apin lama sukung rayat ngagai parti nya majak nambah dibandingka enggau pengawa bepilih sebedau tu.
Sukung rayat ngagai parti tu amat manah sereta nambah lalu meri peransang ngagai kami nyikap diri napi pengawa bepilih ke deka datai, ku iya.
Dalam aum keterubah parti nya pengudah Pengawa Bepilih Besai Ke-13 iya madahka, parti nya ngadu ‘post mortem’ bekaul enggau pemutus PRU ke diatur apin lama.
Ku iya, PKR deka ngumpul semua riput sereta deka dipansik enggau silik nengah sebengkah komiti ke deka ditumbuhka ila.
Iya madahka, entara riput ke diterima Barisan Nasional ngena politik duit maya pengawa bepilih apin lama.
“Pengudah ‘post mortem’ tu baru kami nemu nama ke patut dikereja kami udah tu. Kami deka ngatur aum enggau semua kaban Pakatan Rakyat sereta ngemutuska pekara tu,” ku iya seraya madahka isu NCR tetap dikemeratka PKR.
Bisi datai ba aum nya kemari, Kaban Kunsil Nengeri (ADUN) Krian Ali Biju sereta ADUN Batu Lintang See Chee How enggau kaban PKR ke bukai.